"India Constitution duangtute chuan tribal te humhalhna an ngai pawimawh em em a. A bikin Sixth Schedule phei chuan tribal te humhalh ṭha tak a duan niin hman ṭangkai thiam a ngai tak zet,"

Mizoram Political Science Assocation (MIPSA) chuan Oct 23 leh 24 khan 'Constitutional Safeguards and Tribal Autonomy in India' tih thupui hmangin International Conference an hmang.

He Conference hi Govt. Hrangbana College Department of Political Science-in thlengin, Mizoram Legal Services Authority in a sponsor a. Ni 23 zanah online hmangin technical session neih hnuah ni 24 October ah Hotel Regency ah hun hman chhunzawm a ni.

Conference hawnna hi MIPSA President Dr C Lalhmanmawia kaihruaiin, Govt. Hrangbana College Principal Lalthlengliana Hrahsel-in inlawmna thu a sawi a. Gauhati High Court Judge, Justice Yarenjungla Longkumer chu Khuallian niin a hmanpui.

Justice Longkumer chuan, "tuna Conference thupui hi tribal tamna Northeast state te tana ṭangkai tak a nih thu sawiin, India Constitution duangtute chuan tribal te humhalhna an ngai pawimawh em em a. A bikin Sixth Schedule phei chuan tribal te humhalh ṭha tak a duan niin hman ṭangkai thiam a ngai tak zet," a ti.

A sawi zelnaah, India constitution a bik in article 371A leh article 371G te ngat phei chuan Nagaland leh Mizoram tan thuneihna zau tak pein, hman ṭangkai thiam chuan in humhalhna ṭha tak a nih thu a sawi bawk. Economic a hmasawnna hian tribal te hnam nun ei chhe lo zawnga kal pui a ngaiin, Ladakh ah phei chuan economic development an kalpuina a ram neituten an hnam nun an hloh ṭhen tawh thu a sawi bawk. Hetih lai hian Customary Law hmanga inrelbawl a bikin Mizote leh Naga te pawh in hnam nun ti chhe lo zawng leh hmasawn zawnga in update a tul a ti bawk.

He Conference-ah hian mi thiam hrang hrang thuziak paper 30 lai an zirho a. Tlaiah kum 2025 - 2027 chhunga MIPSA hruaitu tur an thlang nghal bawk.