"Api, khita khawpui de chuaih khi chhun lamah chuan a mawi vak lo na a, zan lamah hian a nalh thei eee, eng khua nge? Ava ropui hmel em em!!!"
"Aizawl a nih khi, Mizoram khawpui ber, Kei pawh hun rei tak ka awm ve tawh a lawm."
"Api, Ka len hunah ka kal ve thei ang em?"
"E thei tehreng mai, kei pawh ka tleirawl laiin lehkha te ka han zir a, ka han awm reng alawm"
"Ehe, api chu i va changkang bik em em. Api, kei pawh ka len deuh hunah khi Khawpuiah khian school te ka han kal ve ang aw. Khi khawpuiah ngei khian lehkha zir paha han awm ve ka chak a ni."
"Taite, khi Khawpuiah khian I kal ve duh tak zet a nih chuan ka thusawi hi ngun takin lo ngaithla ang che.
Khi khawpuia cheng mi hlun te khi maw sum an duh em em a, keini Thingtlang mi tan phei chuan khawsak a harsa hle bawk. In luah tur a vang em em a, in luah man a to em em bawk. Chutih laiin Vai leh hnam dang sumdawng lian te chuan In luah sen loh an hmu thei tho, a awmzia i hrethiam em? Hnam hmangaih aiin sum hmangaih kan ti na tihna a nih chu... Nakinah chuan khi khawpui khi Vai leh Kan chhehvel hnam dang ten an la luah hneh hle dawn a ni.
'Hausa leh rethei kar a zau love' an ti ve bawk naa a nihna takah chuan a zau tawh hle.
Khi khawpuiah khian awm lo a awm mang lo... Zu, ruih hlo...min tichhe vek thei, Pathian mi tak tak leh mi dukdaklo ber ber nen. Ruihhlo zuar vantlang chunglam ni thei khawpa hausa te an dodal ngai lemlo a, Ruih hlo zuar la hausa lemlo te erawh an haw hle. An man sak phei Chuan hlauhawm tak an ni... veng chhung atang an hnawtchhuak a mualpho tak takin Fesibuk ah te an pawsi darh thin. Mi hausa vantlang chunglam te erawh an man palh paw'n a hmingin an han man ve naa, rei an sawi peih lo.. Khi Khawpuia kohhran te pawh khian chutiang ho sum chu an hnar phal vak lo. An ngaidam thuai zel.
Khi Khawpuiah khi chuan nitin mai hian hmasawnna hna an thawk mup mup a, mahse, a thawktute chuan "Khawpui tan a tha em?" tih lam aiin He thilah hian hlawkna ka hmuh chuan a tawk tiin hna an thawk mup mup mai a. Sum lengvak pawh a tam. Mahse, a kawng hrelo laklawh tan chuan thlalera tui zawn ang maiin a vang lawi si.
Khawpui chhungah chuan motor a tam em em a. Mihring an Tam hle bawk. In pawh a tam. Mahse, I hauhsak loh chuan ka chhungte tia duhsak leh rawn ngaipawimawh tu che i nei vak lo ang. Chuvangin, mahni a awm melh melh te i zir a ngai fo ang.
Mihring chengte inchei na a sang hle a, Sapram ho inchei dan nen a danglam lo. Mahse, Khawpui kawtthler leh kawr ruam vel techu Mihring ek leh Bawlhhlawhin a hnawh tet tut veka, uih vung vung lai tepawh a awm. Bawlhhlawh paih pawh an Fimkhurlo hle. Keini Thingtlang angin thenawm te nen in len pawh a chawhmeh in suah techu a awm velo a. Thil ho te pawh sum sen ngai vek zel dawn a ni. Tunah chuan i la naupang ema engkim ila hrethiam lo ang. Mahse, khi Khawpui khi hmangaih tak tak tu nei lo khawpui. Engkim awmna khawpui. Thil tha lo chitin awmna Khawpui leh mi maksak tak tak awmna khawpui a ni tih hria la. I Fimkhur hle a ngai dawn a nih chu," tiin a tupa chu in chhungah a luhpui ta a.
"Nu mittuiin a fa nunna a chhan thei lo, i thisenin a chhan thei a sin,"
Thisen pe la, nun chhanhim rawh.
| EXPLORE MIZORAM |
• Mizoram's Most Trusted Website | Mizoram's Online Encyclopedia •
[ For Ads - Contact +919402125273 ]
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: