Tunhma lama Phuldungsei bial tih thin, he bial hi an vanduai kan ti dawn nge ni tuntum hi by election tumthum anneih na tur a ni ta. Tuntum inthlang tur hi tumdang zawng zawng aiin boruak a sang a, bial chhung mai ni lo Zoram khawvel politics ngaihven mite chuan mit leh beng an len vel ruai a ni ber e.
Heti kauva Zoram mipuite ngaihven rawn a nihna chhan hi engnge ni ang?
Candidate te vang:
By election neih tura candidate te hi kawng engemawti taka Zoram khawvel a lar tak tak te vek an ni hlawm.
MNF official Candidate Dr R Lalthangliana hi tum thum lai Minister lo ni tawh leh MLA a vawi 6 lai thlantlin lo ni tawh a ni a. Tun tum by electiona a din chhan hi a mah chuan vawitam a sawi tawh a. Oppositon lama awm laia MNF Senior Vice President nilai meuh by election-a a ding hi, party a tanga phumbo tumna a awm em ni? ti a party dang ten zawhna an nei pawh hi an hriatthiam pui awm viau e.
Amah hi pa tha tak, mithiam leh ram rorelna ah pawh tawnhriat tha tak lo nei tawh a ni. Thlan tlin pawh lo ni ta se thawhphan nei miah lova hma la nghal char char thei tur mi a ni.
Tun dinhmunah chuan tling thei tura hming ri ring ber te zinga mi a ni. MNF vanneihna em em chu sakhua ang maia party vuan tlat, ruh rum rut, Mizo nationalism nena kal kawp tir tlat, mi tam tak hmun tina an awm hi a ni.
INC official Candidate leh MPCC Vice President Pu John Rotluangliana hi Minister pawh lo ni tawh leh tum thum lai MLA a thlantlin tawh a ni a. Kum 2023 khan he bial hi din tumin a lo en thuak thuak tawh a. Dampa bial thenawm Mamit a bial laiin West Phaileng leh a chhehvel ah hian thiantha tam tak a nei a. A bial hlui Mamit bial a khaw thenkhat te hi West Phaileng a tanga enkawl leh tlawhpawh a awlsam zawk avangin West Phaileng ah ipte pui a bang thin a ni.
Zoram puma Congress boruak a kan hleih theih loh laia veteran politician Pu John-a te meuh in by election-a a ding tur hian chhan tha tawk a nei turah ngai ila. Dampa bial ah Pu Johna'n MPCC Vice President a hlawh chhuak, tia party dang ten an sawi hi a in awm ang viau mai.
A hmel hmuh ruala kuphah mawi hla hriatchhuah loh theih loh te zinga mi Pu John Rotluangliana meuh Dampa biala kal ta chu congress muthlu tawh tam tak chu an rawn tho chhuak tiam tiam niin a lang a. Tun inthlanah chuan tling zo tur khawpin lang rih lo mahse, he bial a congress ruhkawl tak tak te tan chuan congress muthlu kaihthawha awm mek hi lawm loh rual a ni lo ang, kum 3 hnu lawkah Inthlanpui hmachhawn tur an ni tawh bawk nen. Mamit Dist chhunga MLA bial 3 a MLA nih a lungthu kim tuma hma a lak mek na ah hian Pu John Rotluangliana hi a hlawhtling thei dawn em?
BJP official Candidate Pu Lalhmingthanga pawh hi Dampa bialah hian a mikhual lo hle, bial chhung mi a nih chu thuhran lo ni se, he bialah hian a tum thum nan MLA candidate a ni leh thei a ni. State party candidate nih mai chu thil harsa lutuk niin a lang lo a, chutih laiin National pary lian pahnih, inel leh iner em em Congress party leh BJP atanga candidate a ni thei hian Pu Lalhmingthanga hi mi namailo tak a nih zia a ti lang chiang viau awm e.
Mihring mihrinna ah pawh pa thatak leh thiamna leh theihna sangtak nei a ni a, Dampa bial in hma sawn ve se, mi rualin ke pen ve se ti a rilru leh ngaihtuahna seng nasa mi niin a lang.
Chutih rualin politics ah erawh dawhtheihna a tlachham, nghah te han peih ve deuh se aw, ti a duhsaktu awka hriat tur a awm nual mai.
BJP hi central lama rorel mektu an ni a, Dampa bial hi Minority tamna a ni bawk a, kum 2023 general electiona Mizo bika a vote hmuh zahve aia sang a hmuh chuan tling turin chance a nei tha viau mai.
ZPM official candidate Pu Vanlalsailova hi kum 2023 General electiona ZPM party official candidate lo ni tawh tho kha a ni a. Bial mi a nih bak ah vawi hnih lai he lai biala ding a nih a vang in bial chhung hre chiang em em tu leh hmangaih tu a ni. Kum 20 chuang zet Zofa khawvel a milar ni thei, hmingchhiatna nei lo, kawng tam taka mi entawn tlak tak mai a ni a. He Dampa bial tan ngei pawh hian politics a luhchilh hma hian thiltha tam tak a lo ti tawh thin a ni.
Pathian thu hrila a vah kual laiin ram rorelna in sang a thut tumin Politics khawvel a zuang lut a, kum 2023 MLA general election ah Dampa bialah ZPM official Candidate candidate niin vote 292 in Pu Lalrintluanga Sailo(L) kha a hneh zo ta lo a ni.
Pu Vanlalsailova chu Politician a ni lo, Pathian thu hril tura koh a ni a, Pathian fakna hla sa in Pathian thu hrilin rawng bawl leh se, hei hi a kawng tur zawk a ni. ZPM thlipui tleh lai pawha tling zo tawh lo a ni a, tuna party boruak hniam ber lai phei chuan a tling zo lo ang, ti a amah duhsaktu an thahnem hle.
Khawvar hnu a inthlang tur an ni a, ruling party candidate chu tling mai tura rin kai ber te zinga mi ani mek bawk.
Mizoram Peoples Conference Party official candidate Pu K Zahmingthanga hi politics ah mithar a ni lo a. Brig Thenphunga Sailo (L) in Human rights atih lai atanga Pu Thena hnung lo zui tawh leh a policy te tuipui mi a ni a. Tunah hian MPC a Vice President nilai a ni. MLA election ah erawh a vawi 1 in candidate na ani a, an party dinhmun kan hre vek a, an thlen chin tur awm ang pawh kan ngaihruat thiam mai awm e.
Party Vice President te dahkhamna leh Rorel lai party leh sawrkar buk hun a ni:
Tun tum by election danglam na em em chu Party pathum in an rawng huai ber dawttute,an party Senior Vice President leh Vice President te an rawn vawrh chhuak hi a ni awm e. Hetiang hi Zoram politics historyah a awm awm hriat a la ni lo. Party thenkhat phei hi chu politics a inphum bo tumna hmahruai ni awm ang taka inpuh mawh te pawh an awm mek a nih hi. Thenkhat tan lah party a chanvo pawimawh leh sang zawk hlawhchhuahna hmanrua ni a ngaihtheih tur tingin an lo ding ve bawk a. Party pakhat hi chu Mizoram ah kan party kan la awm ve e, tih Mizo mipuite zinga inhriattirna hmanrua ang chauh a ngaihtheih tura ding annih hmel bawk.
MNF, Congress leh MPC te hi Mizo mipuiten kan lo hriat tawh hnu te an ni a. Enge min thlenpui a, tute nge annih kan hriat tawh te anni.
Kan rama rorel mek ZPM sawrkar bukna hun remchang tak a ni dawn a, an sawrkar hma a an thutiam an ti hlawhtling em, an sawi ang in an awm em tih te Dampa mipuiten an buk dawn a ni.
A khawtual mi pahnih ding te hi central a ruling leh Mizoram state a ruling ni mekte an ni a. An pahnih hian MLA general election hnuhnung ber khan he bialah hian an lo tla ve ve tawh bawk a.
BJP lam hi Central lam a tang in an rawn campaign pui leh tan tawh a, tiam theih ang ang te rawn tiamin an theih tawp chu an rawn chhuahpui teh meuh mai. Chutih laiin Mizorama BJP bial kanneih pahnih te hian eng hmasawnna chak leh danglam bik nge an neih te hi zir chiang ve ta ila.
State ruling ZPM lam pawh in tiam chikim an tiam ve mek a, ruling bial ni ngei turin bial mipuite thlem titih vau ti tihin an sawm mek a. Mizoram chhunga ruling bial dang te hian opposition bial dangte aia hma an sawn bik na emaw, an danglam bik viau na emaw a awm em, han thlir zau ve bawk ila.
Tuna tan chuan duhtawk rih ila thawhhnih nan opinion poll kan lak zawh tawh te ziah kan tum leh dawn nia. Chutah chuan Dampa bial boruak, a bikin a Zô khua te chu results tur awm ang a lang ruak tawh ang.
~ Rina Ralte
"Nu mittuiin a fa nunna a chhan thei lo, i thisenin a chhan thei a sin,"
Thisen pe la, nun chhanhim rawh.
| EXPLORE MIZORAM |
• Mizoram's Most Trusted Website | Mizoram's Online Encyclopedia •
[📌 Join WhatsApp channel for updates- https://whatsapp.com/channel/0029Vb66gtL8KMqnoM2JIz12 ]
(Feedback at: admin@exploremizoram.com )
[ For Ads - Contact +919402125273 ]
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: