Assembly spekaer-in sikul hrang hranga sem tur tuizem a vailiam

Aizawl | October 22, 2025: Mizoram Legislative Assembly Speaker Lalbiakzama chuan tukin khan Vanapa Hall kawtah nikuma Cyclone Remal-in a tihchhiat District hrang hranga sikul-te tana sem tur tuizem a vailiam.

School Education Department buatsaih tuizem sem chhuah puala Vanapa Hall kawta inkhawm tawite neihah Speaker chuan thusawiin cyclone Remal-in a tihchhiat hmun hla tak taka awm School ten tui dahkhawlna tur tuizem an dawng tur chu lawmawm a tih thu a sawi a, School te tan hian tui dahkhawlna neih that hi a pawimawh a, heng school te hian an chhawng tangkai hle dawn a ni a ti. Tukin hian Speaker hian tuizem phur motor 10 a vailiam a ni.

School Education Director Angela Zothanpuii chuan Cyclone Remal tuartu tui dahkhawlna nei lo School te tana tuizem semchhuah chu SASCI sum atanga lei a nih thu a sawi a. GEM kaltlangin Finance Department-in procurement tih dan tur a sawi ang thlapa lei a ni tih a sawi. Tuizem sem chhuah hi District hrang hrangah thawn chhuah a ni a, Mamit District-ah erawh chuan inthlan a nih dawn avangin inthlan zawhah sem a ni dawn a ni. District hrang hrang tana sem chhuah tur zat chu Aizawl District tan -16, Lunglei-39, Siaha – 12, Champhai-2, Kolasib -59, Serchhip -1, Mamit -19, Saitual-1 leh Hnahthial – 3 a ni.