Sorkarin kawngpui danchah rem ti lo; dan luih chuan a tul ang in hma a la dawn

Sorkar duh loh zawnga hma an la zel a nih chuan permit cancel thlengin an chungah hmalak theih a ni - Home Minister

Aizawl | Oct 22, 2025: Home minister K Sapdanga chuan vawiin tlai dar 3 khan Secretariat Conference Hall-ah thuthar thehdarhtute kawmin, "Sorkarin kawngpui danchah rem ti lo; dan luih chuan a tul ang in hma a la dawn," a ti.

Sapa chuan, "Hetianga Mizoram chak lakna kawngpui pawimawh ber ni li chhung lai danchah an tum hi Mizoram Sorkar chuan tha a ti lovin kawngpui danchah hi rem a ti lo a ni," a ti.

Mizoram Tipper Assn. (Driver's & Owner's), District Hqrs., Kolasib dist. ten kawngpui pawimawh dan a tum chu ṭhulh turin Mizoram sawrkarin a duh tih a sawi a, mipuite tana harsatna siam thei zawnga hmalak a nih chuan Mizoram sawrkarin a ṭul ang zelin hma a la dawn tih a sawi.

Vawiin chawhnu dar 3 khan thuthar thehdartute kawm a he thu hi sawiin, home minister chuan, Mizoram chak lakluhna kawngpui pawimawh ber, ni li chhung lai danchah an tum chu Mizoram sawrkar chuan ṭha a ti lo a, kawngpui danchah hi a remti lo tih a sawi.

Home minister chuan ruahtui tla a tlem chho a, a bik takin Mizoram chaklakna kawng pawimawh Vairengte leh Sairang inkar kawng pawh Mizoram sawrkar, PWD leh NHIDCL ten an siam chho reng tih a sawi a, kawng siam a khaihlak lohna turin Kawnpui leh Sairang inkar kaltlang tur lirtheite chu intlan chhawk tir ṭhin a nih thu leh chumi vang chuan lirthei tangkhang te pawh a awm ṭhin niin a sawi bawk.

Mizoram Tipper Assn. (Driver's & Owner's), Dist. Hqrs. Kolasib ten 20.10.2025 a thuchhuah an siama an tarlan danin, 23.10.2025 zing dar 7 atanga 26.10.2025 tlai dar 4 thleng Vairengte to Sairang leh Bairabi to Sairang bakah Kawnpui to Durtlang kawng te lirthei tlan theih lohna turin hmalak an tum a ni.

Press Statement of Home Minister K Sapdanga on Oct 22, 2025

No.1 of 2025/2026 Dt. 22.10.2025

Mizoram Tipper Association (Diver’s & Owner’s), District Headquarters, Kolasib District te chuan dt.20.10.2025-a an Press Release-a an tarlan danin dt.23.10.2025 zing dar 7:00 atanga dt.26.10.2025 tlai dar 04:00 thleng Vairengte to Sairang leh Bairabi to Sairang bakah Kawnpui to Durtlang kawng chu lirthei tlan theih lohna tura hmalak an tum chungchang chu Home Minister kaihhruaina-in PWD & Transport Minister, Food Civil Supply & Consumer Affairs Minister leh Home Department, Transport Department, MPWD, FCS&CA leh Mizoram Police official-te chuan uluk taka ngaihtuahin an sawiho a. Hetianga Mizoram chak lakna kawngpui pawimawh ber ni li chhung lai danchah an tum hi Mizoram Sorkar chuan tha a ti lovin kawngpui danchah hi rem a ti lo a ni.

2. Kumin chhung hian chhan hrang hrang avangin Mizoram chhunga kawngpui pawimawhte a tha loin kan inkalpawhna kawng te hmun -ah a chhe hle a. Mizoram Sorkar chuan kan kawng dinhmun hria in Mizoram PWD leh NHIDCL te’n kawng chhia hi siamthat a nih theih nan hma an la reng a, amaherawhchu fur ruahtui a tlak nasat avangin duh anga siamthat a la remchang lo a. A bik takin Mizoram chak lakna kawng pawimawh Vairengte to Sairang kawng pawhin duhthu a sam lo hle a ni.

3. Tunah hian Mizoramah fur ruahtui tlak hun a tawp chho-in ruahtui tla pawh a tlem chho a. A bik takin Mizoram chaklakna kawng pawimawh Vairengte leh Sairang inkar kawng pawh Mizoram sorkar, PWD leh NHIDCL te’n an siam chho reng a. Helai kawng hi siam reng a nih avangin kawngsiam a khaihlak lohna turin Kawnpui leh Sairang inkar kaltlang tur lirthei-te chu intlan chhawk tir thin a ni a, chuvangin lirthei tangkhang te pawh a awm thin a. Tunhnaiah ruahtui tla a tlem chhoh avangin kawngsiam pawhin hma a sawn zel a, lirthei te pawh tam zawka chhhuah ni in lirthei tangkhang pawh a tlem chho zel a. Tukin (22.10.2025) dar 8:30 thleng khan lirthei tangkhang a awm lova, Aizawl lam panin lirthei load phur 367 chhuah ni in Kolasib lam pan tur lirthei 618 chhuah a ni bawk a, darkar 24 kalta chhungin avaiin lirthei 985 helai kawngah hian an tlan tlang a ni. Kolasib District Bawrhsap hova helai kawng siam chungchanga inkawmhona neiha tarlan a nih danin kumin November ni 1 atang chuan helai kawng hi theitawp chhuaha siamthat tur a nih thu tarlan a ni bawk a ni.

4. Hetianga Mizoram Sorkar leh NHIDCL te’n Vairengte leh Sairang inkar kawng siamtha tura hma an lak reng lai a kawng siam chungchanga lungawi lohna lantira, Mizoram mipuite tana harsatna nasa zawk siam zawnga Mizoram Tipper Association (Driver’s & Owner’s), District Headquarters, Kolasib District ten helai kawng dang tura lungawi lohna lantir an tum hi Mizoram Sorkar chuan kaltlangpui lo se a duh a. Tin, National Highway 306/06 hi Mizoram chak lakna pawimawh leh mipuite in kalpawhna kawng pawimawh a nih bakah kan mamawh engkim kan phurh luhna kawng a nih avangin helai kawng dan hian Mizoram mipuite tan harsatna nasa tak a thlen dawn avangin Mizoram Tipper Association (Diver’s & Owner’s), District Headquarters, Kolasib District te’n helai kawng dan tum hi Mizoram Sorkar chuan a ngai thutak hle a. National Highway danchah (block) hi National Highways Act 1956, section 8B hnuaiah thubuai siam theih an niin na taka hrem theih a ni a. Hemi bakah kawngpui dan hi dan bawhchhiatna a nih angin India Ram dan thar Bharatiya Nyaya Sanhita (BNS) 2023, section 126 leh section 285 angin na taka hrem theih a ni bawk. Tin, kawngpui dang chata mipui mamawh ‘Essential Commodities’ phurh kualna tihbahlah hi Mizoram Essential Services Maintenance Act, 1990 bawhchhiatna a nih avangin na taka hrem theih a ni bawk. Mizoram Tipper Association (Driver’s & Owner’s), District Headquarters, Kolasib District ten mipui harsatna siam zawnga lungawilohna lantir an tum chungchangah hian an lirtheite hi Transport Vehicles an nih angin dan fel tak hnuaiah permit pek an ni a. Sorkar duh loh zawnga hma an la zel a nih chuan The Motor Vehicles Act, 1988 hnuaiah permit cancel thlengin an chungah hmalak theih a ni.

5. Hetiang hi thil awmdan a ni tih hriain Mizoram Tipper Association (Driver’s & Owner’s), District Headquarters, Kolasib District te’n kawngpui pawimawh danga mipui tana harsatna siam thei zawnga hmalak an tum hi thulh turin Mizoram Sorkar chuan a duh a. Chutiang a nih loh a Mizoram mipuite tana harsatna siam thei zawnga hmalak a nih chuan Mizoram Sorkar chuan a tul ang zelin hma a la dawn a ni.

Issued by Home Department, Government of Mizoram

"Nu mittuiin a fa nunna a chhan thei lo, i thisenin a chhan thei a sin,"

Thisen pe la, nun chhanhim rawh.

| EXPLORE MIZORAM |

• Mizoram's Most Trusted Website | Mizoram's Online Encyclopedia •

[📌 Join WhatsApp channel for updates- https://whatsapp.com/channel/0029Vb66gtL8KMqnoM2JIz12 ]