ZPM-in danin a phal chinah CSS Employees Regularization Scheme siam that rel

#AMCECC an lawm leh lawm loh hriat a la ni lo!

Aizawl | Sept 18, 2025: ZPM Coordination Committee vawiin a thukhawm chuan CSS Employees Regularization Scheme, 2024 chungchang an thlirho a, 'dan in a phal chinah siam that,' an rel.

Committee chuan, CSS Employees Regularization Scheme sawrkar hmasa (MNF) lo duan sa chu tidanglam loa hman a nih thu tarlangin, hei hi a khirhdeuh niin a hria a, 'CSS Employees Regularization Scheme hi dan in a phal chinah awlsam deuh zawk a siam that leh nise,' an ti.

ZPM Coordination Committee chu vawiin khan CSS hnathawkten Sorkar-a an thilphut hrang hrang tihlawhtling tura lungawi lohna an lantir mek chungchang ngaihtuahin Chief Minister Lalduhoma hovin an thukhawm a ni.

THUCHHUAH

ZPM Coordination Committee Dt. 18.09.2025 a thukhawm chuan CSS Employees chungchang a thlir a. CSS Employees Regularization Scheme sawrkar hmasa (MNF) lo duan sa chu tidanglam lova hman a ni a, hei hi a khirh deuh niin a hria a, CSS Employees Regularization Scheme hi Dan in a phal chin ah awlsam deuh zawk a siam that leh nise a ti.

Chuvangin, CSS Employees te mipui harsatna siam tawh lova hna ngai chhunzawm tawh turin a ngen a ni.

PB Lalsawmliana

Member Secretary,

ZPM Coordination Committee

CSS Employee-te mipui harsatna siam tawh loa hna ngai chhunzawm tawh turin ZPM Coordination Committee chuan an ngen nghal a. ZPM Coordination Committee thutlukna avang hian CSS hnuaia thawkte hian lungawi lohna lantir an titawp dawn em tih erawh he thu buatsaih lai hian hriat a la ni lo.

A ni thumna atan, Vawiin khan AMCECC member sing chuangin lungawi lohna an la lantir chhunzawm zel a, Aizawl-ah chuan YRC-ah mi sang chuang an pungkahwm a, Aizawl bakah hian Lunglei, Siaha, Champhai, Kolasib, Serchhip, Mamit, Saitual, Khawzawl, Hnahthial, Ngopa, Phullen leh Suangpuilawnah te mi thahnem tak an pungkhawm niin thu dawn a ni.