Adviser to CM (Political) in SBI N Vanlaiphai Branch hawng

N Vanlaiphai | September 18, 2025: Vawiin ni 18 (Ningani) September 2025, 11:30 AM khan Mizorama SBI branch 53-na N.Vanlaiphai Branch chu Pu Lalmuanpuia Punte, Adviser to CM (Political) chuan a hawng.

Muanpuia Punte chuan, "SBI hi India rama banking leh finance huangah a kila lung pawimawh ber a ni a, sorkarin a enkawl leh a thuneihna bank 'Public sector bank' an tih zingah a lian ber a ni. Chuvangin Central scheme tam tak hi SBI nen inthlun zawm a ni a, helai biala lo neitu leh kuthnathawktute pawhin kan hman ṭangkai tur scheme tam tak a awm a, a bik takin kan sorkar hmalakna pui ber hand holding/bana kaih policy hmang ṭangkai thei tur he bialah hian mi tam tak an awm a, chung mite tan theihtawp min chhuahpui turin Bank hotute pawh hma la turin ka ngen che u a ni" a ti.

Muanpuia chuan sawi belhin, "He bank hawn a nih theihna tur hian kum 10 têl hma lo lak tawh niin, a chang chuan kan beidawng lek lek thin. CM pawhin hma min lak pui nasa a, a chungah kan lawm hle. Chuvangin MLA lo kal tawh te leh khawtlang mipuite nen, kan zavaia thawh rah a ni," a ti a.

Bialtu MLA chuan, "India rama bank lian ber hi a khaw mipui ten hmang tangkai ula, he khua mai bakah a chhehvel khua leh in khawchhuak mi tam tak account hawng turin sawm ula. Bank-a sum dah zawng zawng aṭanga za zela loan pek chhuah zat hi Credit Deposit Ratio (CDR) an ti a. Chumi awmzia chu CDR a tam chuan Bank-in loan a pe chhuak tam tihna a ni a, vawiina bank kan hawn pawh hian CDR 60% aia tam nei turin ka ngen bawk che u a ni. Chutih rualin mipui lam pawh loan rulh theih loh puk hi mahni phurrit insiamna a nih avangin mahni rulh zawh tawk erawh mipui ten hria ila a pawimawh" a ti.

Muanpuia chuan, "Kar hmasa maia ruahsur nasain Phaidung leilet a chim chhe nasa hle tih ka lo hria a, ṭanpuina awm thei thei kan dap ho dawn nia," a ti bawk.

SBI N Vanlaiphai Branch hawnna program hi Zonunsanga, Manager HR, RBO, Aizawl-in a kaihruai a, PRichard Pauthianmung, CM (DVAS), RBO, Aizawl-in vote of thanks a sawi.

[Join WhatsApp channel for updates- https://whatsapp.com/channel/0029Vb66gtL8KMqnoM2JIz12 ]