Zoram Thar-in kan hnam nihna Zofate chungchang session-a sawiho tura ngenna Assembly Speaker hnenah an thehlut

Aizawl | Sept 25, 2025: Zoram Thar hruaitute chuan vawiin chawhma dar 11 khan Mizoram State Assembly Speaker Lalbiakzama hnenah kan hnam nihna (national identity) Zofate a nih thu Session sawiho tura chhawp chhuak tura ngenna an theh lut a. An thu thehluh leh thehluh chhan te Press Conference neiin an sawi fiah.

Assembly Speaker hnena an lehkha thehluh chu hnam ṭobul an chhui chhuah aṭangin kan thlahtu Zo, Zova, Yo leh Jo a ni ti a kan pi leh puten an lo sawi ṭhin Bible a Jakoba (Israela) fapa Zosefa kha a ni a. Keini Zo hnahthlak intite hi Zosefa fapa pahnih - Ephraim leh Manesia thlah kan zel Zofate kan ni tih a ni an ti. Zoram Thar hruaituten he kan hnam nihna sawifiahna United Nation ah te, India leh Israel Prime Minister hnenah leh khawvel ram Veto power nei- USA, UK, Fance, Russia hruaitute hnenah an thehluh tawh thute an ziak tel bawk. December 17, 2021 ah Zofate hnam lungphun Thenzawlah hawn a ni lh tawh thu te, he hnam lungphunah hian Zo hnahthlak Zofate chi hming zawng zawk ziah vek a nih tawh thute an ziak tel. He hnam lungphunah hi hnam peng aiawh ṭheuh ten an hawng a, pawl hrang hrang aiawhte nen innlungrualin Hnam Nihna Thuthlung (National Identity Referendum) siamin a nemngheh nan hming an lo ziah tawh thute an thlen tel bawk.

Zoram Thar hruaitute chuan Zofate hi kan bona a rei tawh avangin kan hnam nihna dik tak pu tawh lovin hnam hrang angin kum tam tak kan lo awm tawh tih an sawi a. Mahni ramah cheng mah ila hnamdangte rorelna India, Myanmar leh Bangladesh hnuaiah kan la awm rih a ni. Thlahtu bul thuhmun, hnam khat vek si kha hnam hrang anga chhinchhiah kan ni. India Constitution Article 366 (25), Article 342 leh Article 744 ah te chuan Assam, Meghalaya, Mizoram, Nagaland, Tripura leh Maniourah Zo hnahthlak Zofate chu hnam (tribe) hrang 25 - (1) Mizo (2) Hmar (3) Pawi (4) Lakher (5) Kuki (6) Lushai (7) Paihte (8) Gangte (9) Vaiphei (10) Thadou (11) Halam (12) Anal (13) Chiru (14) Chothe (15) Ralte (16) Simte (17) Kabui ( 18) Koireng (19) Kom (20) Maring (21) Monsang (22) Purum (23) Simte (24) Aimol (25) Zou.

Zoram Thar hruaitute chuan thlahtu bul thuhmun leh hnam khat ṭhendarh leh awpbeh te hi hnamah kan harh hun a thleng tawh a. H Lianmangan hla hmanga min kohna- Harh ru Zofate harh ru, hnehna ropui kan chang thuai ang, Kan Pathian hmingin puanzar kan zar ngei ang khawvelah a lo tih kha tun hun hi a ni an ti.

[Join WhatsApp channel for updates- https://whatsapp.com/channel/0029Vb66gtL8KMqnoM2JIz12 ]