Zanin LESDE Mizo Idol-ah mi 27 inlan dawn!

Aizawl | Sept 25, 2025: LESDE Mizo Idol Season 8 neih mekah zanin hian 1st Round intihsiak zan thumna chhunzawm a ni dawn a, mi 27 an inlan ang.

Zonet buatsaih LESDE Mizo Idol Season 8 intihsiakna neih mek chuan boruak a nei lian chho zel a, TV leh Social media paltform hrang hrang atanga entu pawh an pung chho zel a ni. 1st Round intihsiakna hi Thawhleh zan atang khan Zonet Studio-ah tan niin, intihsiak zan hnihna nizanah khan mi 26 an inlan a, intihsiakna hi a hmunah Judge ten an thutchilh nghal avangin ngaihhlut a hlawh phah hle a ni.

1st Round intihsiakna hi zanin hian chhunzawm a ni dawn a, mi 27 an inlan leh dawn a, intihsiakna hi zan dar 8-ah Zonet Zawlbuk, Zonet Youtube Channel leh Zonet Application Empai-ahte Live-a pek chhuah a ni ang.

LESDE Mizo Idol 1st Round intihsiaknaah hian Contestant-te hman turin Guitar leh Keyboard chhawp a ni a, 1st Round intihsiakna hi naktuk, Zirtawpzanah zawh a ni dawn a, Ist Round intihsiakna atang hian Top 50 thlan chhuah tur niin, heng mite hian intihsiakna an hmachhawn hunah top 20 thlan chhuah leh tura ruahman a ni a. Intihsiakna hi top 10 atangin Mualpui-a R. Dengthuam Hall-ah neih a ni dawn a, Live Music hmanga intihsiakna hi neih tura ruahman a ni.

LESDE Mizo Idol-ah hian Contestant-te an tha hlawm hle a, Judge te tan pawh lu tihai rum rum thei tur khawpin an intluktlang a ni.

Puan tawh thin angin LESDE Mizo Idol Season 8 neih mekah hian Application form lak chhuah ngai lovin, Virtual Audition hmangin Augsut ni 15 atang khan mahni zai lai video theh luh theih a ni a, video theh luh theih hun tawp August ni 31 thleng khan mi 716-in an zai lai video an theh lut a, heng video luhte hi endik a nih hnuah tun thla ni 9 zan khan Audition result puan niin, mi 105 in First Round an lut a ni.

Mizo Idol Season 8-a pakhatna chuan cheng nuai 2 a dawn dawn bakah LBS Suzuki-in Scooty an pe dawn a, pahnihin cheng nuai 1 leh pathumnain cheng sing 5 an dawng dawn a ni.

[Join WhatsApp channel for updates- https://whatsapp.com/channel/0029Vb66gtL8KMqnoM2JIz12 ]