GAC Golden Jubilee pual Inter - College Debate Competitionah HBC zirlai HC Lalrinfela a thiam ber!

Aizawl | Sept 25, 2025: Govt. Aizawl College chuan an college Golden Jubilee pualin vawiin 25.9. 2025 hian Inter-College debate competition an buatsaih a. Thupui atan “Mipui hnena tui thianghlim pêk leh faina kawngah sorkarin hma a la ṭha tâwk a ni,” tih hman a ni a, drbate ah hian HC Lalrinfela, Hrangbana College zirlai chu pakhatna a ni.

Debate Competition-ah hian GAC Principal Lalbiakzuala'n inlawmna thu sawiin, Public Health Engineering Department Secretary Teresy Vanlalhruaii'n debate competition hi a hawng a ni. He Debate Competition-ah hian Mizoram chhunga College 10 - Pachhunga University College, Hrangbana College, T Romana College, J Thankima College, Johnson College, Aizawl West College, Mizoram Law College, Mizoram Christian College, Serchhip College leh HATIM Lunglei te an tel a ni. He Competition hi Moderator Lalnunṭawma Fanai -in kaihruaiin, Judge atan Stephen Auhmun, Dr Lalrinnunga Hmar MZU leh Prof. C Vanlalhruaia te hman an ni.

Debate competition-ah hian HC Lalrinfela Govt Hrangbana College chu Pakhatna niin, Vanlalkhawngaihdawngzeli Pachhunga University College chu pahnihna a ni a, Dinsawmkimi Govt Hrangbana College chu Pathumna a ni.

Govt. Aizawl College hi kum 1975-a din niin, kumin 2025 hi a kum 50-na Golden Jubilee a ni a, a lawmna programme chi hrang hrang buatsaih a ni. Tunah hian Govt Aizawl College hi Mizoram Sawrkar hnuaia College zirlai ngah ber ni in BA leh BCOM zirlai 1893 bakah Post Graduate – Department of Education-ah zirlai 40 vel an awm mek a ni.