Zirsangkima lehkhabu, 'puanzàr phèn' tlangzarh

Aizawl | Sept 20, 2025: Vawiin September ni 20, 2025 chawhnu dar 1:00 khân School Edn. Minister, Dr Vanlalthlana chuan Zirsangkima lehkhabu thar ber, "puanzàr phèn" chu a tlangzarh.

Tlangzarhtu Minister chuan, mi hlawhtlinna, a rah an seng chauh thlir loa an beih nasat dante hi kan ṭhalaiten zira entawn se a duh thu a sawi a, "Chutiang tura hetiang lehkhabu, mi choa mi tiphur thei tur lehkhabu kan tlangzarh thei hi lawmawm ka ti hle a ni," a ti.

Tunlai Mizo thalaite làwmzáwng mila lehkha ziak ṭhin, "ramada 19" te leh "2" tih lehkhbute lo ziak tawhtu Zirsangkima lehkhabu 5-na tur "puanzàr phèn" hi, a lehkhabu hmasate ang lo takin thawnthu awm lohna (non fiction) a ni a. Mi lâr hrang hrang—zai thiam, lem chan thiam, infiam mi, ziaktu, sumdawng leh zirna kawnga mi hlawhtlingte chanchin … mi nazawngin, "puanzàr phèna an chanchin" kan hriat loh a chuang a. Hei bâkah hian Mizo zinga mi chhuanawm leh fakhlawhho nun langsâr lo lai a inzep nual bawk.

Zirsangkima hi The Zozam Times leh Zalen columnist ṭhin a ni a; tunah hian Zalen Pathianni chhuak chanchinbuah chauh a ziak tawh thung. Zirsangkima lehkhabu hi Rs 300/- man a ni a. Lehkhabu dawr hrang hrangah ngaihven theih a ni ang.