Sept 25 zanah Youth Icon 2024 Top 10 music video tlangzarh leh concert!

Aizawl | Sept 19, 2025: Lammualah hlawhtling taka concert an neih atanga thla 9 hnuah Youth Icon 2024 Top 10 ten a huhoa in Concert an nei leh dawn a, Music Video an siam an tlangzarh nghal bawk dawn.

Youth Icon 2024 Top 10 te hian ruihhlo dona hla Music Video an buatsaih mek a, Video shooting hi an zo fel tep tawh a. An Music Video hi September ni 25 zanah Dawrpui Multipurpose Hall-ah tlangzarh tumin ruahmanna an siam a, video tlangzarh zawhah Concert an nei chhunzawm dawn.

Icon star te chuan an fans ten a huhoa concert an neih leh theih hi an beisei thin a, chumi tihhlawhtling chuan hma an la chho leh ta tih an sawi a, Concert-ah hian ticket a awm dawn a, a man erawh a to dawn lo a, tu tan pawha lei ngam tur a ni dawn tihte an sawi a; an zai lo ngaina tute zawng zawng chu Concert an neih tur hi chhim vek turin an sawm a ni.

LPS Youth Icon 2024 top 10 te hian nikum December ni 14 zan khan Lammualah Concert an nei a, a hlawhtling hle a, lammual khat tlatin mipui an pungkhawm a. Mizoram chhunga zaithiam ticket neia Lammuala concert nei ngam tlemte te zingah an tel tih pawhin a sawi thei a, lammual khat tlat maia chhimtu mipui an awm hi titi a tling pha hial a ni.

[Join WhatsApp channel for updates- https://whatsapp.com/channel/0029Vb66gtL8KMqnoM2JIz12 ]