THIL PAWIMAWH TI TURIN HUN I NEI TAM TAWK

_Nun Atana Hmanrawn Bawm_

- Rick Warren

- Sep 9, 2025

“Thil engkim tih ka tan a thiang a; nimahsela, thil engkim tih a tha kher lo.”  1 Korinth 6:12

Tirhkoh Paula chuan, “He thil pakhat hi ka ti thin - hnung lama thil awmte chu theihnghilha, hma lama thil awmte chu banin, Krista Isuaa Pathian chung lam koh chhan lawmman hmu turin tiam chin lam chu ka pan talh talh a ni.” Philippi 3:13-14. Paulan thil hrang hrang tih a tum duah lo. Pathianin a kohna chhan ang takin Isua Chanchin Tha chu a hril mai a ni.

Hringnuna thil pawimawh zirchhuah hi thiam thil a ni a - thiam thil dang ang tho va a taka tih ngai a ni.

I duh apiang emaw i mamawh apiang emaw i tih vek a ngai kher lo. Chanchin lawmawm deuh chu Pathianin thil zawng zawng ti turin a beisei lo che a ni. Hringnunah hian dah pawimawh ngai bik thil tlem a awm a ni. 

Pathianin thil zawng zawng ti turin a ko lo che. A siam chhan leh a duan chhan ang taka nung turin a duh che a - chumi tur chuan hun pawh i nei tam tawk a ni.

Hringnunah hian thil tha tam tak a awm a, nimahsela chungte chu an pawimawh vek kher lo a ni. Bible chuan, “Thil engkim tih ka tan a thiang a; nimahsela, thil engkim tih a tha kher lo,” a ti. 1 Korinth 6:12. 

I nun a nia i duh zawng chu i ti thei a lawm. Pathian chuan a ti lui dawn lo che a. I nun i khawhral thei emaw, i nun i chen thei emaw, i nun chu i khawlkhawm thei emaw bawk a ni. 

Engkim tih a thiang a - nimahsela engkim tih chu a tangkai vek kher lo a ni. Hringnuna thenkhatte hi chu kan ti a nih pawhin sualna an nei hran lo va; an tangkailo kan tihna mai a zawk.

Hringnunah hian engnge pawimawh hmasa tih i zirchhuaha i nunpui chuan hun leh tha tam tak i khawlkhawm dawn a ni. He khawvelah hian Pathianin a dah chhan che i hriat chhuah tawh phei chuan, nun chu i man fuh tihna a ni.

Hringnuna thil tih hmasak tur leh a pawimawh hmasa i hriat poh leh, tuna i nihna ah, kawppui emaw, nu emaw pa emaw, leh hruaitu emaw i nihnaah i tangkai zawk ngei ang.  

Ngaihtuah zui atan

* Pathianin a Thu ah a tarlan angin eng nge i nunah langchhuak se tih a duh?

* Thil thenkhat tha si, nimahsela dah pawimawh hmasak tur ni si lo vah, engtin nge ‘aih’ i tih theih ang?

* I nunah thil tih hmasak tur leh dah pawimawh hmasak tur engtin nge i thliarfel theih ang?

*[Lettu: Sangpuia]*