HSA GHQ thuoitu haiin ram thuoitu thenkhat an hmu

Aizawl | Sept 8, 2025: Hmar Students' Association (HSA) General Headquarters thuoitu hai chun vawisun khan Mizoram Speaker Lalbiakzama, Minister of State Lalnghinglova Hmar, MLA & Ex Minister Robert Romawia Royte hai chu December 3 - 5 sunga Saipum khuo-a 60th General Assembly & Sikpui Ruoi hmang ding le inzawmin inhmupuiin an hohlimpui.

Vawisuna an inpawl tlangnaah hin, Minister Lalnghinglova Hmar chu a lo inhawng khawp el a, fiel a ni ang thang ngei a tum thu a lo hril. Assembly le Sikpui inurna dinga hin fund tieng khawm a theitawp insuo a thangpui a tum thu a lo hril bawk. Speaker khawm a'n hawng hle a, programme a uop ngei ding thu le a theina po poa theitawpin thangpui a intiem bawk. Robert Romawia Royte khawm a'n phal hle a, Assembly le Sikpui inurna ding Siel pakhat le Vawk pakhat tum dingin a'n tiem bakah fund hmuna dinga sawrkar tieng theitawpa project a lo bawzuipui ding thu a hril bawk niin HSA thuoituhaiin an hril.

@ Speaker Lalbiakzama Pisa

HSA GHQ aiaw-hai hi Vice President Josef V Tuolor a rawiin, General Secretary Lalringsan Darngawn, Assistant General Secretary James Pusing, Public Relations Secretary Zothanmawii Zote, CEC Member Jacob Amo, HSA Mizoram State Chairman & Pub Relations Secy Henry L Khojol le HSA Jiribam JHQ General Secretary Khuongremthang Hmar hai an ni a, Sinlung Hills Council (SHC) CXhief Executive Member (CEM) Ricky Lalremsanga in a tawiawm bawk a ni.

@ Minister Lalnghinglova Hmar Pisa

Hieng an inhmupui hai po po chungah HSA chun lawmthu an hril a, HSA Asembly le Sikpui Ruoi a hlawtling theina dinga thahnem an ngaina chu HSA ropui a ti a. HSA chun an inhmupui lai hin, ram le hnam ta dinga an inpekna le an sin thaw ropui an ti zie inlangtirna dingin Hmar Thangsuopuon an inbattir seng bawk a nih.

@ Robert Romawia Royte Pisa

Ruohmang anga an um thei chun, HSA thuoituhai hin zinga zingkar dar 10 hin Chief Minister Lalduhoma hmu an ta, Thangsuopuon inhlan malamin Sikpui Ruoi-a khuollien dinga fiel an tum a nih.

HSA thuoituhai hi Sept 6-a HSA Executive Council inthunga hung, la cham an nih.

[Join WhatsApp channel for updates- https://whatsapp.com/channel/0029Vb66gtL8KMqnoM2JIz12 ]