Mizorama kawngpui tha neih theihna tura PWD leh YMA thawhhona thuthlung sawiho

Aizawl | Sept 11, 2025: Vawiin ni 11.09.2025(Ningani) chawhma dar 10:30 ah khan Central YMA Hall ah PWD leh YMA ten Mizorama kawngpui tha kan neih theihna tura thawhhona thuthlung an ziah chungchang sawihona hun hman a ni a. PWD E-in- C H Zoramliana leh Central YMA President Lalhmachhuana ten an kaihruai.

PWD Engineer- in- Chief H Zoramliana'n thusawiin Mizoram chhunga inkalpawhna kawngpui tha kan neih theihna tura PWD leh YMA thawhhona a tha a, PWD in kawngpui enkawl an ngah thu leh sum indaihlohna avanga duhthusama enkawl theih a nih loh thu te, YMA te tawiawmna leh thawhpuina an mamawh thu a sawi. MOU ziah avanga hmun tam takah hmasawnna leh kawngpui siam kawnga awlsamna an hmuh thu a sawi.

Central YMA President Lalhmachhuana pawhin thusawiin YMA ten kawngpui siam te pawngpaw sawisel mai lova MoU ziah anih avanga tawiawm tur leh thawhpui tur kan nih dan te, sawisel tul a nih chuan huai taka sawisel a tul thu leh en pui zel turin YMA hruaitu kalkhawm te a chah a. PWD nena thawhhonaah theihtawp chhuah a kawngpui tha kan neih theihna tura hma la turin a chah bawk.

He hunah hian Sub- Hqrs YMA, Group YMA leh Branch aiawh te an kalkhawm a. Zawhna leh chhanna hun hman a ni a, Zoram hmun hrang hranga kawngpui siam chungchanga harsatna leh kawngpui chhia chungchangte sawiho leh inhrilhfiahna hun hman a ni bawk.

YMA leh PWD te hian kum 2018 atang khan thawhhona thuthlung an lo ziak tawh a, kum 2022 ah ziah thar leh a ni a, tunhnai August 8,2025 khan kum

3 chhung atan MoU hi ziah thar leh a ni.

He hunah hian PWD atangin E-in- C leh a thawhpui CE, SE, EE te an tel a, YMA lam atangin Central YMA OB, CEC, Sub- Hqrs aiawh, Group YMA aiawh leh City Branch aiawh te an tel.