Lunglei Government College-in Diamond Jubilee lawm

Lunglei | Sept 10, 2025: Lunglei Government College (LGC)-in an college kum 60 tlin, Diamond Jubilee lawmna kum tluana an buatsaih chu vawiin khan an College Auditorium-ah a hmawr bawkna hun an buatsaih a. Mizoram sawrkara Higher & Technical Education (H&TE) Minister Dr Vanlalthlana chu khuallian niin, Lunglei High Powered Committee (HPC) Vice Chairman & Lunglei North MLA Pu V. Malsawmtluanga chu khual zahawm a ni.

LGC Principal puitling hmasa ber Rev Dr CL Hminga

LGC Auditorium-a Diamond Jubilee hmawr bawkna inkhawm buatsaihah khuallian Dr Vanlalthlana chuan school leh college tam tak an pamṭul ṭhin laia LGC-in diamond jubilee an thleng thei leh B++ College an ni thei chu a lawmpui thu sawiin, chhim bial leh Mizoram pum hmasawnna atana ṭan la zel tur leh thil thar ching chhuaktu leh hmahruaitu nih tum turin a chah a. H&TE hnuaia Minister a nih hnua sawrkar laipui aṭanga cheng vaibelchhe 100 vel um chhuah tawh aṭangin Lunglei tan hma lakna tur ruahmanna ṭhahnem tak siam a nih tawh thu a sawi a. Lungleia sawrkar college pahnih - Lunglei Government College leh Government J. Buana College tihchangtlun nan ruahmanna hrang hrang siam a nih thu sawiin, LGC tana hmeichhe hostel sakna tur te, administrative block chei ṭhatna tur te, library panna kawng leh inthiarna (toilet) siam ṭhatna tur bakah, hmanrua leh mamawh hrang hrang atana ruahmanna awmte a tar lang a. Mizoram Engineering College chu a nih tur anga kum thar aṭanga kalpui ṭan a nih theih nan sawrkarin sum tam tak dahin hma lak mek a nih thu sawiin, Mizoram Polytechnic Lunglei pawh ṭha taka kalpui a nih theih nan sawrkarin theih tawp a chhuah zel dawn tih a sawi bawk.

Minister Dr Vanlalthlana chuan thing chu ṭha leh hlawk taka rah chhuak turin a zung lama a imsawh ngheh hnuah a inpho chhuak chauh ṭhin tih sawiin, lang lo lama zung kaih hmasa lova par chhuah tum chu thil tih chi loh tak a ni, a ti a. Awlsam taka hlawhtlinna a awm loh thu leh hlawhtling turin rim taka beih a ṭul thu sawiin, mi larna leh hlawhtlinna phena lang lo lama an thawh rimna chu zir chiang a, mahni incho nan leh intihchak nan hmang ṭhin turin zirlaite a fuih a. Zirlaite chu college-a zirna hmanraw ṭha tak takte leh tun lai thiamnate hmang ṭangkai tur te, Entrepreneurship Knowledge Cell (EKC) te pawh an hma huna hna an zawn thiam nan leh mahnia an intunnun theih nana inzirna atan ṭangkai taka hmang turin a chah.

Khual zahawm V Malsawmtluanga chuan LGC-in volleyball tournament an khelh tura jersey lei nan Students' Union hruaitute kutah cheng sing khat a hlan a. LGC-in diamond jubilee an thleng chu a lawmpui thu leh diamond jubilee lawmna puala thisen pek leh vantlang tana thil ṭha chi hrang hrang an tih chu fakawm a tih thu a sawi a. LGC chu college satliah ni lovin, mi ropui tak takte lo chher chhuak tawhtu college a nih thu sawiin, zirlaite chu an collegw chhuak mi hmasa entawn tlak tak takte entawn leh zir chung a, nasa zawka lehkha zir a, mi hman tlak nih tum turin a fuih a. Lunglei HPC kal tlanga LGC tihchangtlunna tura hma laknate tar langin, hma lakna hrang hrang zingah LGC basketball court chei ṭhatna tur sum dah a nih tawh thu leh campus chhung kalkawng chei ṭhatna tur pawh a chhuah thuai a beiseiawm thu a sawi.

LGC Diamond Jubilee Celebration Committee Vice Chairman C Lalremchhunga'n hun kaihruaiin, LGC Principal Lalrammuana Chawngthu chuan inlawmna thu a sawi a. LGC diamond jubilee hriat rengna lehkhabu (souvenir) chu LGC-a Principal puitling hmasa ber, kum 1964 - 67 chhunga Principal hna chelhtu, Rev. Dr CL Hminga (kum 97) chuan a tlangzarh a. Voices of LGC te'n LGC hlapui, "Summa Supremo" sain, LGC Cultural Club-in hnam lam chi hrang hrang an entir bakah, zaithiamte zai ngaihthlak a ni a. Associate Professor Pu R. Lalrochama'n lawm thu sawiin hun a khar.

LGC Diamond Jubilee hmawr bawknaah hian Lunglei South MLA Pu Lalramliana Papuia, Lunglei West MLA Pu T. Lalhlimpuia, Lunglei Municipal Council (LMC) Chairman Pu Lalzuithanga leh councillor-te, H&TE Additional Secretary Pi R. Lalmuankimi, Additional State Project Director (RUSA) Dr C. Zarzoliana, sawrkar department leh zirna in hrang hranga hotute, LGC-a Principal leh thawktu dang leh zirlai chhuak tawhte, District MJA member-te leh sawm bikte, LGC-a thawktute leh zirlaite an tel a. Auditorium-a hun hman zawh hian diamond jubilee lawmna ruai kil ho zui a ni.

Lunglei Government College hi kum 1963 September ni 10 khan mi ṭhahnem ngaite'n "Lungleh College" (Lunglei College) tih hming puin an din a. Gauhati University pawmpuina (recognition) tel lova kum khat kalpui a nih hnuah, Principal puitling hmasa ber atan Baptist Kohhran pastor Rev. Dr CL Hminga chu sawm niin, ani ho hian University pawmpuina hmuh a ni a. Principal puitling hmasa ber Rev. Dr CL Hminga'n a hna a zawm ni, September ni 10, 1964 hi LGC din ṭan ni atan hman a ni.

Tun dinhmunah LGC-ah hian Bachelor of Arts (BA) leh Bachelor of Science (B.Sc) zirna awmin, kum 2025-2026 academic session kal mekah department 14-ah zirlai 845 vel an awm a. Zirtirtu nghet 47 bakah, casual teacher leh thawktu dang (non-teaching staff) eng emaw zat awmin, College din tirh aṭangin Principal 23 an awm tawh.