CM hovin Neihloh khaw thar tur ruahmanna thlirho

Aizawl | Sept 10, 2025: Vawiin khan CM Office-ah Chief Minister Pu Lalduhoma hovin a bial Neihloh khaw thar tura duan (proposed plan) chu official pawimawh leh Neihloh khawtlang hruaituten an enho.

Neihloh khaw thuthmun hi leilung chhiatna thleng thei (Disaster) lakah a him tawh lova, kumin fur pawh hi an tuar nasa hle a ni. Hetiang dinhmuna an din avang hian an khawtlang chuan a khaw ram chhung, tuna an khaw thuthmun thlenhma deuhah hian khaw thar kai mai an duh a. Sorkar atanga hmasawnna hnathawhna tur sum an hmuhte pawh khaw thar atan an dah deuh zel tawh a ni.

Bialtu MLA leh Chief Minister kaihhruaina hnuaiah khaw thar tur ruahmanna hi Town & Country Planning, UD & PA chuan plan an siam a, vawiin hian an thlirho ta a ni.

Lalhruaitluanga Ralte, Asst. Director, Town & Country Planning chuan Neihloh khaw thar, chenna in 108 leh sorkar hmunhma pawimawh engemaw zat awm theihna tur plan an siam chu sawifiahna a nei a. A hmunhma hi a rang lama sam fai ni se, hmalak bul tan theih chi apiang chu tan mai ni se an ti.

Chief Minister hi Commissioner & Secretary to CM Vanlaldina Fanai, chuan a tawiawm a, UD & PD official pawimawhte leh Neihloh khawtlang hruaitute an tel bawk.