LPS Youth Icon top 10 music video tlangzarh leh concert zaninah

Aizawl | Sept 24, 2025: LPS Youth Icon top 10 ten an huhoa an lanna tur ruihhlo dona hla Music Video an siam chu zanin dar 8-ah an tlangzarh dawn a, an Concert chhunzawm nghal ang.

Nilaini zan dar 8-ah Dawrpui Multipurpose Hall-ah Music Video tlangzarhna hun leh Concert turin Youth Icon top 10 te ngawrh takin an inbuatsaih zel a, Concert ticket hi vawiin tlai dar 3 atangin Dawrpui Multipurpose Hall kawtah lei theihin a awm tan dawn.

Icon star te hian an fans te pualin an hla sak ngai lohte sak an tum a; a huhoa zai turin an in ruahman bawk.

Icon star te chuan an zai ngainatu, anmahni duhsaka hmangaihtu, an fans te chu an concert hi chhim theuh turin an sawm a. An fans zinga mi naupang kum 10 hnuai lam leh Vohbik te'n concert hi an chhim duh a nih chuan a thlawnin luh tir an tum a, hetah hian anmahni hruaitute mi pakhat pawh free an ni dawn a, midang kalpui tu dang erawhin ticket an lei a ngai thung ang.

Youth Icon top 10 concert ah hian ticket man to bik siam a ni dawn lo a, Rs. 200 in hrut rual a ni a. A kal hmasa apiang te chu a hma lamah an thu thei mai dawn a ni.

Youth Icon top 10 te hian a huhoa an lanna turin ruihhlo dona hla Music Video an siam a, Video hi tunlaia Music Video siamtu hriat tlawh Osiama kut chhuak a ni dawn a, an hla hi hlaphuah thiam C Awma phuah a ni.

[Join WhatsApp channel for updates- https://whatsapp.com/channel/0029Vb66gtL8KMqnoM2JIz12 ]