CM leh MZP hruaitu tharte inkawm; ram leh hnam tana thawhpui-ah an insawm tawn!

Aizawl | Sept 24, 2025: Vawiin khan Chief Minister Lalduhoma leh Mizo Zirlai Pawl (MZP) hruaitu tharte an inkawm a, Chief Minister hian MZP hruaitu tharte duhsakna hlanin ram leh hnam tana thawhpuiah a sawm.

MZP hruaitute hian Chief Minister chu a tulna apiangah sorkar thawhpui tura an inpeih thu sawiin pawl tana hma an lak tum dan hrang hrangte an hrilh bawk.

Chief Minister chuan, "MZP hruaitu tharte chu zirlaite, ram leh hnam tana an ke pena kawngah duhsakna a hlan a, ram leh hnam tana tha turah chuan theihtawp chhuaha thawhho puiah a sawm a ni".

MZP President Dr C Lalremruata chuan, Zirna chungchang leh Zirlaite chu an ngaih pawimawh ber tur a nih thu a sawi a, ram leh hnam tana tha turah chuan Sorkar thawhpui an inpeih reng thu Chief Minister hnenah hian a thlen a, inkawmhona hun tha tak a siam avangin lawmthu a sawi bawk a ni.

MZP hruaitute hi an president Dr C Lalremruata hovin an kal a, Vice President Sanghmingthanga, General Secretary C Lalhmingsanga, Assistnt General Secretary Lalentlinga, Treasurer Rothanliana leh Finance Secretary Nangsawmthanga te an ni.