Khawvel huapa scientist ṭha thlan zingah Dr Samuel-a a tel

Aizawl | Sept 30, 2025: National Institute of Technology (NIT), Silchar-a associate professor Dr Samuel Lalṭhazuala Rokhum chu Stanford University leh khawvel research publication journal rin tlak Elsevier ten khawvela scientist ṭha an thlan chhuah ‘Top 2% Scientists List, 2025’ zingah a tel.

Dr Samuel Lalṭhazuala Rokhum s/o TL Khama, Kolasib New Diakkawn hi Chemistry subject-a doctorate degree hmu a ni a, NIT, Silchar-ah August 26, 2013 aṭangin a thawk.

Khawvel huapa University tha Stanford University leh khawvel Research Publication Journal rintlak berte zinga mi Elsevier-in khawvel Scientist tha an thlanchhuah "Top 2% Scientists List, 2025" ah Kolasib New Diakkawn mi Dr. Samuel Lalthazuala Rokhum hi a lang a. Nikumah khan "Top 2% Scientists List" ah hian a lo lang tawh bawk a, Mizo zinga ‘Top 2% Scientists List’-a lang hmasa ber leh awmchhun a ni.

Dr. Samuel Lalthazuala Rokhum hian research publication 160 chuang nei tawhin, khawvel scientists dangte zir tham journal tha tehna- impact factor sang tak takah a publish tawh a. A research midangte'n an lo zira, reference atan an hman (research citation) pawh 6,000 chuang a nei tawh bakah H-index pawh 43 a nei mek a. Science leh Technology lam hawi lekhabu 4 a ziak tawh a, tunah hian khawvel huapa science journal tha pawl International Journal of Energy Research leh Journal of Nanotechnology-ah te Academic Editor a ni mek a ni.

[Join WhatsApp channel for updates- https://whatsapp.com/channel/0029Vb66gtL8KMqnoM2JIz12 ]