Raw thing tam vangin khaw 138 velin harsatna tawk mek; sazu hrai runpui kalpui!

Aizawl | Sept 30, 2025: Agriculture & Farmers’ Welfare Department Minister Pu PC Vanlalruata chuan nimin khan a office-ah department official pawimawh te ko khawmin, tunhnai Raw Thing Tam avanga sazu puang chungchang an sawiho a, district hrang hranga hmalakna kal mek te thlirhovin, hmalak zel dan tur te ngaihtuahin inkawm hona hun an hmang.

He hunah hian, Raw Thing Tam avanga sazu puang hi hriat theih chinah khaw 138 velin harsatna an tawk mek, tih tarlan a ni a. Agriculture Department chuan DAO kaltlangin, farmer te hnenah sazu tur—bromadiolone, zinc phosphide te tam tham tak a sem tawh a, sem tur hmabak pawh eng emaw zat a la awm a ni. Sazu puang nasatna khuaah te chuan VC te nen tangkawpin department chuan sazu hrai runpui a kalpui mek bawk.

Meeting-ah hian Agriculture & Farmers’ Welfare Department Secretary Pu Ramdinliani IAS; Director Pu R Lalnunzira te leh officer dang eng emaw zat an tel a ni.

[Join WhatsApp channel for updates- https://whatsapp.com/channel/0029Vb66gtL8KMqnoM2JIz12 ]