FCAA 2023 chungchangah CM Lalduhoma'n dawt a sawi lo

Aizawl | Sept 8, 2025: Assembly Speaker Lalbiakzama chuan vawiin khan a pisa-ah thuthar thehdarhtute kawmin, FCAA 2023 chungchangah CM Lalduhoma'n dawt a sawi loh thu a sawi a. Assembly Ministry Term-a Zawhna chhan loh zat sawiin,

7th Assembly Session INC(Congress) 2013 -18-ah 23, 8th Assembly Session MNF 2018-23 ah 180 leh 9th Assembly Session ZPM(till date) 2023 atanga vawiin thlengin zawhna 3 chauh chhan loh a nih thu a sawi bawk.

PRESS HANDOUT

Tunhnai August 27 & 28, 2025 a Session neih zawh taka thil chi hrang hrangah titi a tam hle a. Legislative Assembly te pawh han puhmawhna leh an duty-te hlenchhuak tawk loa ngaih theih te a awm bawk a. Chutiang thil hrang hrang zawhna awm thei leh hriat hmaih te pawh awm palh thei a ni a. Chuvang chuan mipuiten thil nih dan an hriat theihna atan he Press meet hi neih tula hriat a ni.

1. Tun session-ah khan zawhna chhanloh a tam tih leh chhang tlai tih chungchang-

- Assembly session zawhnate hi mipuiten an aiawha an thlan chhuahte thil hriat duh a nih avangin pawimawh lo pakhatmah a awm lova. Chuvangin mipuite thil hriat duh hi chhan loha a awm lohna turin theihtawp kan chhuah a ni. Amaherawchu, zawhnate hi a then chu a karkikin Aizawl Secretariat-a hriat kim mai theih loh, District leh Block, Division, Sub- Division, Village level- khaw hrang hrang atanga lakkhawm ngaite a lo ni thei a. A zavai chuan a hun takah chhan hman a ni lo ti ta ila a ni deuh ber mai a. Sorkar kal tawhah pawh a ni tho hei hi chu, thil awm dan pangngai a ni zawk. Zawhnate dawn tlai deuh a nih pawhin unstarred-a letin memberte hnenah a hnua pek leh vek thin an ni. A pawi zawk ta a chu zawhna CHHAN MIAH LOH hi a ni. Sorkar term 2 kalta chhunga party 2– INC (2013-18), MNF (2018-23) leh term hmang mek ZPM (2023-tilldate) ten Assembly zawhna an chhan loh zat khaikhinna chu hetiangin:-

Term of Assembly Ministry Term Zawhna chhan loh zat

7th Assembly Session INC(Congress) 2013-18 23

8th Assembly Session MNF 2018-23 180

9th Assembly Session ZPM (till date) 2023 -till date 3

Ministry hmasa lam felfai tak, tun ministry buarchuar leh fel lo em em anga sawi hi chu a dikhlel deuh maithei.

2. Session neih takah khan a tuka kan tih tur kan hmu tlai tia member thenkhatten an sawi chungchang–

- Session neih dawn hma ni hian a tuk a business turte member tin hnenah inpek thin a ni a. August 27, 2025-a neih tur hi a hma ni August 26, 2025, 5:40 pm ah Mizoram Legislative Assembly website-ah dah a ni a. Tin, MLA zawng zawng awmna Whatsapp group-ah August 26, 2025, 5:40 pm-ah post a ni bawk.

Session-a zawhna awmte hi a tam tham thin avang leh zawhna leh chhanna hun te a rei loh avangin zawhna lut zing atangin pawh (ballot) a ni thin a. Tun hma zawng chuan zawhna atanga chhanna awm tawh atanga pawh a ni thin a. Tun tum khan ballot hmuna kal member ngenna angin chhanna awm pawh; awm lo pawh; pawh vek a ni ta a. Dt.27.08.2025-a chhuak tur zingah chhanna dawn loh a la awm avangin Department lam te pawh rang taka rawn thehlut tura ngen an ni a, anni pawhin theihtawp chhuahin an buaipui a, August 27, 2025-a lut tur kha a hma zan August 26, 2025 zan dar 8 pelh hretah dawn a ni a. Chu chu copy 50-a siama han buaipui leh chuan hun a lo duh veleh deuh a. Zan dar 10 pelh hretah semchhuah a ni ta a ni. Member thenkhatin dar 12 pelhah ka hmu chauh an tih chu an dawn hun lai tak kha chhinchhiah dan awm tawh hek lo le.

Member ten a tuka kan business tur chu a ngaihven tan chuan a hriat hmana ngaih a ni. (August 26, 2025 - website & whatsapp @ 5:40pm, Hardcopy @ 10 pm)

3. FCAA, 2023 Resolution chungchangah member ten zehluh thut a ni, inpuahchahna leh inzirna hun kan nei lo an tih chungchang-

- FCAA, 2023 Draft Resolution copy hi Session tan hma ni 7ah Bulettin Part-II, No.101, dt. 19.08.2025 hmangin August 20, 2025 (Wednesday) ah hard copy-in MLA te an inah pek vek an ni a, Mizoram Assembly website-ah pawh dah a ni nghal bawk. Session neih hmain kar (week) a tla a, hemi chhung hian a duh tan chuan inpuahchah leh inzir hman tura ngaih an ni. An lo inpuahchah lo emaw, an lo inzir lo a nih chuan memberte mawhphurhna zawk a ni ang.

4. FCAA, 2023 chungchanga Act leh Rules copy te pek kan ni lo tih chungchang-

- Session-a Resolution lut reng reng te hi a Resolution content bak Act leh Rules-te member te hnenah pek an ni kher lo. A relavent Act leh Rules an hre duh a; an zir duh a nih chuan tunhma pawhin member thenkhatten Library ah an rawn ngaihven mai thin a, hetiang thil a thlen thin avangin kan Library section-ah member (MLA) te pui tur liau liauin “Members reference section” siam a ni nghe nghe. Tin, public domain-ah a awm a, tute tan pawha website atanga download theihin a awm a ni. Ngaihven tak tak tan chuan download mai tura ngaih a ni. Pu Rohmingliana, MLA zahawm tak pawh khan nimin piahah ka download a ti a. A hmalam daihah khan lo download-in lo zirchiang ta se a va tha dawn em!

5. Sorkar hmasa, MNF sorkar khan Resolution hmanga FCAA, 2023 an lo oppose thua Chief Minister Pu Lalduhoma dawt sawia puh chungchang-

- Indian form of Government hi thuang thum a kal ani a, 3 pillars tih pawh a ni bawk. Legislature, Executive leh Judiciary te an ni. Legislature hian dan siamna leh ram inrelbawlnaa inkaihhruaina lam a buaipui a. Executive hian Legislature tena dan an siam leh inkaihhruaina tura an rorel kengkawh turin hna an thawk ve thung tur a ni a. Judiciary chu thubuai/hlabuai chinfel lama thawk a ni.

Pu Lalduhoma khan dawt a sawi lo!

Rule 137 of the “Rules of Procedures and Conduct of Business” in a phut angin, session a Resolution-te hi Legislative Assembly-in official-in State sorkar-ah a hriattir tur a ni a. Chumi ang chuan FCAA, 2023 oppose-na Resolution pawh kha Chief Secretary, Govt. of Mizoram ah pek a ni, Lok Sabha pawh hriattir an ni bawk. Lok Sabha hi Legislature-a kan parent body a ni a, Legislative information te hi library-a an lo vawnthat turin pek ve thin an ni.

Han sawi thui deuh ila, Legislature lamin Chief Secretary, Govt. of Mizorama a hriattir khan Mizoram sorkarin a tih tur a intan chiah a. Sorkar kalta khan hemi piahlam hi a hmalakna hriat a ni lo. Hei hi Chief Minister Pu Lalduhoma’n sorkar kalta khan hma a lo la lo a tih lai kha a ni.

Assembly Secretariat lamin Assembly House-a thurel Legislative information a pek kha Sorkar (Executive) hmalakna nena sawipawlh chi niin a lang lo.

6. House proceedings a thu pass kalphung sawifiahna-

- Assembly House-ah member ten an thurel reng rengte thlir dan hrang hrangin an sawiho (debate) thin a, chumi hnuah chuan House ngaihdan lak a ni thin. Memberte hnenah remti-in ‘Remti’ ti ula, rem tiloin ‘Rem tilo’ ti ula tiin Speaker/Chairman ten an ngaihdan an la thin

a. Hetia ngaihdan lak a nih lai a, Remti lo an awmloh chuan lungrual taka pass-a ngaih a ni thin. Tun tuma FCAA, 2023 adopt chungchangah khan Remti ka zawt a – remti an ti a, Remti lo in awm chuan ‘Rem ti lo’ ti rawh u ka tih leh khan rem ti lo tumah an awm lo. Chuvangin kha Resolution kha lungrual taka pass zinga ngaih ani.

7. General Purpose Committee (GPC) thurel tawh Council of Ministers-in tihdanglam a ni ngai lo tih a ni a. Hetiang hi a lo awm tawh reng em… tih chungchang-

- Hei hi a awm tawh a, MNF ministry kalta a GPC meeting March 4, 2020-in Mizoram Legislative Assembly (Grants of Loans and Advances to Members) Rules, 2000-a Sub-rule (d) of Rule 4 delete tura a rel chu Council of Ministers meeting July 12, 2020 in a pawm lo tawh a ni. *MLA te housing loan installment-a pek chhuah thin tihbo a, tum khata lak theih dan tura rawtna a ni.

Hei hi a thu chu a ni:-

2. Section 4 sub-section (d) “The loan amount shall be disbursed in three installments depending upon the stage of construction and the amount of each installment shall be as under:-

(a) First installment: equal to forty percent of the loan for starting construction;

(b) Second installment: equal to forty percent of the loan after the house has been constructed upto floor level;

(c) Third installment: equal to twenty percent, i.e. the balance amount of the loan, after the roof level has been completed, provided that the second or third installment shall be released only when the member certifies and the Sanctioning Authority is satisfied that the amount of the first or second installment, as the case may be, has actually been utilized for which it was drawn.” - shall be deleted … -tih a ni.

Mahse hei hi Cabinet meeting khan tipuitling lo in “The Mizoram Gazette” No. H.12019/1/2020-PAD, dt.26thAugust, 2021 chhuakah chuan Sub-rule (d) of Rule 4 chu omit/delete a ni ta lo a ni.

Tun tuma GPC thurel tawh Council of Ministers in a defer kha MLA te Travelling Allowance Rs.2.00 Lakh ni thin Rs.3.00 Lakh a tihpun chungchang a ni a. GPC ah khan hnial pawlte pawh an awm tho mai a, mahse committee ah chuan a tam zawk ngaihdan anga kalpui thin a nih avangin pass kha a ni ta a. Cabinet meeting khan kan sum dinhmun te a duhawm lutuk rih loh lai a ni a, mahni leh mahni hamthatna lam hi chu I hmanhmawh lo rih ila, kan sum dinhmunte en chungin kan la ngaihtuah tha leh dawn nia tia an rel kha a ni a.

Kan Assembly Secretariat te hian theihtawp chhuahin tan chu kan la ve viauin kan inhria a. Mahse duhthusam loh lai leh tlinlohna tam tak pawh kan nei thei a. Insiamthat pawh kan tum zel a ni.

Mipuite tichiai thei thil leh thil dikhlel niawm taka sawite leh thuthang, mimal insawichhiat bawih bawihna thil a awm hian kan benga ri chin Side-A chauh ngaihtuah loin, Side-B lam pawh ngaithla ve phawt ila, chumi hnuah chauh ngaihdan siamturin mipuite kan inngen a. Hetianga kan kal chuan sorkar leh mipuite inkarah pawh thawhhona tha leh ram hmasawnna leh rorelna tha a thlen zawkin a rinawm.

***

[Join WhatsApp channel for updates- https://whatsapp.com/channel/0029Vb66gtL8KMqnoM2JIz12 ]