KRISTIANNA HIAN HLUTNA A NEI EM?

  Nun Atana Hmanrawn Bawm

-    Rick Warren

-    Sep 8, 2025

“Miin khawvel hi a pumin nei sela, a nun chan si sela, a tan engnge sawt ang? A nih loh leh, miin a nun aiah engnge a pek ang?”  Matthaia 16:26

Krista ngaihsaklohna khawvel ah hian Krista tana nun hi a awlai lo hle.

Tirhkoh Paula chuan Kristiante chu, “Tun dam chhung chauhva Krista chunga beiseina kan neih chuan mi zawng zawnga khawngaihthlak ber kan lo ni ang,” ati a ni.

Hei hi zawhna pawimawh tak a ni ta:  Kristianna hian hlutna a nei em?

Hringnunah hian engpawh mai hian man a nei a ni. Lehlamah “aw” i tih khan, lehlamah chuan “aih” i ti tihna a ni.

Isuan, “Miin khawvel hi a pumin nei sela, a nun chan si sela, a tan engnge sawt ang? A nih loh leh, miin a nun aiah engnge a pek ang?” a ti a ni. Matthaia 16:26

Mi tam tak chuan khawvel thilahte an nun an thap a ni. A then chuan hmeichhiat mipatnaah te, rosum ah te an nun an thap a. Ngawlveinaah te, sum leh pai leh hmingthannaah te an nun an thap a ni. Hlawkna leh lungawina an dawn let miah lohna tur thilah te an nun an thap ngam a ni. I nunna hi a hlu a nia aw!   

Paula chuan a hrechiang khawp mai. Philippi 3:7-8 ah a chanchin a sawi khan, “Ka tana hlawkna tur apiangte chu chung chu Krista avangin channaah ka ruat ta a ni. A ni tak meuh mai, ka Lalpa Krista Isua hriatna ropui bikzia avangin thil engkim pawh channaah ka ruat a ni; amah avangin thil zawng zawng ka chan ta vek a, chung chu hnawmhneah lek ka ngai a, Krista ka hmuh theihna turin,” a ti a ni.

Paula chuan Isua aia hlu - pawisa emaw, dinhmun emaw nawmchenna emaw - engmah a awm lo a ti. Time magazine-a chuang ngei ngeite pawh tumahin karhnih hnuah chuan an hre zui tawh lo. Khawvel thilte chu reilote atan an nih vang a ni. Luka 9:48 ah chuan in zavai zinga te ber hi a ni, ropui ni a ti a ni.

Hlawhtlinna te pawh hi sawifiah a ngai a. Hlawhtlinna awmzia tak tak chu i thilneih te, i landanah te, that i tih zawngah te a inghat lo va. Hlawhtlinna tak tak chu Pathian duhzawng anga i nun chiah hian a lo thleng thei dawn a. Tichuan vanramah lawmman hlutak neiin i cheng ve thei dawn a ni.

Isua hi a hlu asin!

Ngaihtuah zui atan

* Engvangin nge mi tam takin sum leh pai, larna leh nawmchenna ten an um nia i hriat?

* I hun hman dan leh i bank account hian i thil ngaihtuah zawng engtin nge a pholan?

* Engvangin nge Kristianna hi hlu nia i hriat?

I nunah hian engber nge i um?

Hlawhtlinna tak tak chu Pathian duhzawnga i nun atang hian a lo thleng dawn a ni. Isua tana nun hman i duh em? I duh anih chuan, hetiang hian tawngtai rawh:

"Lalpa, thil ka lo tihsual tawh zawng zawng min ngaihdam avangin ka lawm e. Ka duhnaah ka kal a, mahse tunah chuan i khawngaihnaah ka rinna ka nghat e. Ka sualte min ngaidam turin ka ngen a che.

Vawiin hian Isua Krista ka tana a inpekna zara chatuan nunna a thlawna min pek chu ka pawm e. Vanram hi ka hlawk chhuak thei hauh lo tih ka hria. He Thlarau thil thlawn pek hi ka pawm e. Ka nunah lo cheng la, i hmangaihna, hlimna, muanna leh dawhtheihnain min vur ang che.

Lalpa, ka nuna thil bîk, thlarau lama theihna min pek hi ka pawm e. Hmu chhuak a, i tana hmang a, puntir a, min siam anga nung turin min pui ang che. Isua hmingin, Amen."

Isua pawm tura i ṭawngṭai a nih chuan Rick@PastorRick.com ah hian min rawn bia la, Isua nen zinkawng in zawh dunna atana thil ṭulte ka lo thawn dawn che nia.

[Lettu: Sangpuia]