Dr Zoramdinthara'n National Award to Teacher for Higher Education 2025 dawng

Aizawl | Sept 5, 2025: Vawiin ni 5th September 2025 khan Vigyan Bhawan New Delhi ah India President Pi Droupati Murmu chuan Dr. Zoramdinthara, Associate Professor & Head, Department of Mizo, Mizoram University chu National Award to Teacher for Higher Education 2025 chu a hlan a. He chawimawina hian Silver medal, Certificate leh pawisa fai 50,000 a keng tel a ni.

National Award to Teacher for Higher Education hi India hmarchhakah a dawng hmasa ber a ni nghe nghe. Dr Zoramdinthara hian kum 2015 khan State NSS Award for Programme Officer chawimawina leh Indira Gandhi NSS Award for Programme Officer chawimawina chu kum 2016 khan India President Pranab Mukherjee hnen atangin a dawng tawh bawk a ni.

Kum 2025 a Zirtirtu Tha Chawimawina dawngtute hi Higher Education atangin mi 21, School Education atangin mi 45 leh Skill & Entrepreneurship Ministry atangin mi 15 in chawimawina an dawng a ni.