Agriculture Minister leh Tourism Minister in Hmuntha zau lo zawhpui an hmang

Serchhip | September 6, 2025: Nimin khan Association of Tour Operators Mizoram (ATOM), Tourism Department leh Agriculture Department tangkawpten Agro Tourism chawikan nan Hmunṭha Zau Lo Zawhpui an buaitsaih a. Agriculture Minister PC Vanlalruata leh Tourism Minister Lalnghinglova Hmar ten an hmanpu a ni.

Minister PC Vanlalruata chuan thusawiin loneituten hlim taka lo zawhna hun an hmang thei chu a lawmpui a. A bial chhung Hmuntha khua chu khaw taima tak an nih thu leh Tourism Department ten hma thar lakna tlak an ni tih hria a, ruahmanna an siamsak avang leh home stay sa tura hma an lakpui avangin lawmthu a sawi bawk.

"Keinin ngaia kan neih hi State pawn lam mi, khualzinte tan thil hmuhnawm tak a tling thin" tih sawiin Tourism Minister Lalnghinglova Hmar chuan khualzin mite hip nan Lo Zawhpui hi tangkai taka hman theih a ni, a ti. Tawi tlang hi tourism hmun atana puan a ni tawh tih Minister chuan a sawi a. Khualzinten an tlawh chak theih nana chei a nih tur thu leh India ram hmelhriat khawpa chei tuma ruahmanna an neih mek thu a sawi bawk.

Tourism Director R Lalrodingi chuan Mizo nuna bet tlat lo zawh hi tunlai mil deuha tih theih a ni em, tih kan enchhin tawh a, zawngchhang tlak niin kan hria a ni, a ti a. Kumtluana hah taka hnathawktute tan hlim ni an ni, tiin, nakinah chuan state pawn atanga rawn chhimtute pawh an la awm zel turah kan beisei a ni, a ti bawk.

He Hmuntha Zau Lo Zawhpui-ah hian Agriculture Director Pu R. Lalnunzira chuan inlawmna thu a sawi a. Hmuntha VCP P Lalrinchhana pawhin lo zawhpui buatsaihsaktute chungah lawmthu a sawi bawk a. Agriculture Secretary Ramdinliani, SYS Jt Secretary H Dolianbuaia bakah sawrkar department hotu ten he hun hi an hmanpui a, ropui takin ruai nen hlim takin lo an zo a ni.