Dampa bial bye election MNF Candidate atan Dr R Lalthangliana puang

Aizawl | Sept. 3, 2025: Dampa Bial By Election-a MNF candidate atan MNF Sr. Vice President nilai Dr R Lalthangliana (Dr Thangtea) puan a ni.

MNF Candidate hi MNF President Zoramthanga'n vawiin chhun dar 12 khan Mizo Hnam Run, Aizawl-ah a puang.

Dr Thangtea hi a fapa te'n an ṭawiawm a, Hun lo taka mual liam ta, Dampa bialtu MLA Lalrintluanga Sailo nupui leh a fanuin an ṭawiawm bawk a ni.

Dampa Bial MLA By-Election atana MNF Official Candidate, Dr. R. Lalthangliana chanchin tlangpui:-

Chhungkua, pian leh murna:-

Dr R Lalthangliana hi August ni 6, 1956-ah Zotlang, Lunglei District-ah a piang a, a pa chu R. Dengchhunga (L) a ni. Kum 1982-ah Ngurmawii Sailo nen an innei a, fapa pahnih - Dr. Vanlalchhanhima Ralte leh Rev. Samuel Vanlalawmpuia (tunah Ph.D a ti mek) an nei. Dr. Thangtea te chhungkua hi Kohhran leh Khawtlanga inhmang tak an ni a. A nupui, Pi Ngurmawii Sailo hian MHIP General Headquarters Aizawl-ah President Term hnih chelh tawhin, tunah Vice President nihna a chelh leh mek a ni. An chhungkua hian anmahni In Kanaan veng, Aizawl-ah an cheng mek a ni.

Zirna lam:

Kum 1974-ah Serkawn Christian High School aṭangin HSLC a pass a. Kum 1978-ah St. Edmund’s College, Shillong aṭangin BA a zo leh a, kum 1980-ah MA (Sociology) First Class-ah NEHU aṭangin a zo leh bawk.

Kum 1982-ah NEHU, Shillong pumpuiah M.Phill Grade ‘A’ -ah zovin, a chhuak hmasa ber a ni. Kum 1986-ah Ph.D a zo leh a, NEHU hnuaia Sociology Department-ah Ph.D Degree la hmasa ber record a ni nghe nghe. NEHU pumpuiah Doctorate Degree, Mizoram aṭanga hmu hmasa ber a ni bawk.

Zirlai hruaitu a ni:

Dr R Lalthangliana hian a lehkha zir lai aṭangin ram leh hnam a vei ṭhin hle a, mahni zirlaipuite tana theihtawp chhuah mi a ni a. Nihna a lo chelh tawh ṭhenkhat te -

1. Kum 1978-1979 chhung khan All Mizo Students’ Federation (AMSF), Shillong-ah President a ni a.

2. All Mizo Post Graduate Students’ Union Headquarters, Shillong-ah kum 1979-1980 chhungin President a ni bawk.

3. MZP leh AMSF Joint Headquarters infinkhawm (tuna Mizo Students’ Union) Shillong-ah khuan kum 1979-1980 khan President hmasa ber a ni.

4. India Hmarchhak State 7, Zirlai inzawm khawm North East Region Students’ Union (NERSU) dintu niin, Senior Vice President 1979-1981 chhung a ni bawk.

5. Shillong MSU President kum 1980 a nih laiin, B. Vanlalzari dam chhung lung in tâng tur lak chhuahnaah a sulsutu ber niin, Tejpur Jail aṭangin an la chhuak.

Kohhran leh Khawtlang-ah:

Dr R Lalthangliana hi lehkha a zir lai(MA a zirlai) kum 1980-ah Shillong-ah Kohhran Upa atan thlan a ni a. Hetih lai hian kum 25 mi chauh a la ni. Kum 1980-1985 chhung khan Shillong Mizo Kohhran-ah vek Secretary hna a chelh bawk.

Kum 1986 khan Aizawl-ah Kohhran Upa atan ordained a ni leh a. Young Men’s Christian Association (YMCA)-ah Chairman Term 5 a ni tawh a. Tunah hian YMCA Aizawl ah President ni lai a ni.

Ram rorelna - Politics lamah :-

Dr. Thangtea hian kum 1986-ah MNF Party a zawm a, party chhungah nihna hrang hrang chelhin Ṭhalai (MNYF) President leh General Headquarters-ah Vice President nihna te chelhin tunah hian Sr. Vice President ni lai a ni.

Term ruk (6) zet MLA a lo ni tawh a. Mahni bial ngai ( Lunglei North)-ah a zâwnin term 5 chhûng MLA a ni a. Chatlak awm hauh loa mahni bial ngaia tling nawn thei, Mizoram record a ni. Cabinet Minister-ah term 3 (kum 15) zet a lo ni tawh bawk. Heng kum-ah te hian MLA/Minister a lo ni tawh a ni - 1989(MLA), 1993(MLA), 1998(Minister), 2003(Minister), 2008(MLA) leh kum 2018-ah te Minister a lo ni tawh a ni.

Cabinet Minister a nih chhung hian heng sorkar department te hi hneh takin a lo enkawl tawh bawk - (i) School Education (ii) Environment & Forest (iii) Information & Public Relations (iv) Rural Development (v) Land Revenue & Settlement (vi) Distric Council (vii) Secretariat Administration Department (SAD) (viii) Health & Family Welfare (x) Commerce & Industries (x) Higher & Technical Education.

MLA leh Minister a nih chhung hian Mizoram tan leh North East State te tan hnathawh ropui tak tak neiin, Foreign ram dawr tur pawhin a zin chhuak tam tawh hle a. America (USA)-ah sorkar thil pawimawh buaipuiin vawi 4 zet a kal tawh a. Australia te, Europe ram hrang hrang a kal chhuak a, Asia ram hrang hrang - Japan, South Korea, Thailand, Philipines, Taiwan, Indonesia, Malaysia te pawh a lo dawr tawh ṭhin a ni.

Minister a nih chhungin North East State bika School Education Minister Conference-ah kum 8 chhung (2000-2008) ‘Chairman’ a ni a, a huhoa Central Minister an dawr-in a sulsutu ber a ni ṭhin. NE State Rural Development Minister conference-ah te, Mining Minister Conference-ah te leh Environment & Forest Minister conference-ah te pawh Chairman a lo ni tawh bawk.

Covid-19 hripui (Pandemic) avanga khawvel ram tam tak, economy-ah leh Health lama an tlakchhiat em em laiin, Dr. Thangtea hian harsatna lian tham tâwk loin kum 2 zet hripui lêng karah hotupa nih chan changin theihtawp a chhuah a. Chumi zarah chuan harsatna lian tham tuar loin, Central leh Foreign ṭanpuina te hailutin Covid-19 hripui pawh kan tuar chhuak thei a ni.

Covid-19 hripui leng a lo ziaawm hnu khan USA Taxas State khawpui Dallas-ah leh California, Los Angeles-ah te UN Aids hmalaknain Meeting pawimawh tak takah a zuk tel a. Mizoram State Health Stengthening Projects atan, India pawisaa cheng vaibelchhe 280/- zet Wolrd Bank sum sawi chhuakin, ṭangkai takin tunah hian hman mek a ni nghe nghe.

[Join WhatsApp channel for updates- https://whatsapp.com/channel/0029Vb66gtL8KMqnoM2JIz12 ]