Adviser to CM (Finance & Planning) in Chartered Accountant aspirants leh Commerce zirlaite hman tur reading room hawng

Aizawl | Sept 2, 2025: Nimin 01.09.2025 khan Pu TBC Lalvenchhunga, Adviser to CM (Finance & Planning) chuan Institute of Chartered Accountants of India (ICAI), Eastern India Regional Council (EIRC) buatsaih Investor Awareness Programme, Central YMA Conference Hall, Tuikhuahtlang ah khuallian niin hun a hmanpui. Investor Awareness Programme hi financial literacy lama mipuite an hmasawn theih nan Institute of Chartered Accountants of India buatsaih a ni.

Adviser to CM chuan zirlai ten Chartered Accountant Mizo ngei, entawn tur an nei ta chu a lawmawm a tih thu a sawi a. Chartered Accountant leh Company Secretary te a tam zawk kan neih theih nan theih tawpa inbuatsaih turin a fuih a ni. Zirlaite chu sawrkar hna ringawt beisei loa, mimal a sumdawn a, private practice neih tuma beih a tul thu te a sawi a. Financial literacy lamah Mizo ten hmasawnna tur kan la neih tam thu a sawi bawk a ni. He hun ah hian EIRC a an hotute - CA Vishnu K Tulsyan, Chairman, EIRC, CA Hari Ram Agarwal, Secretary, EIRC ten, “Investor Awareness, Importance of Saving & Financial Planning”, tih thupui hmangin thusawina hun an hmang a ni.

Hemi hunah vek hian Pu TBC Lalvenchhunga chuan Central YMA Building-ah, Reading/Study Room a hawng bawk a ni. He Study room hi ICAI leh School Education Department ten kum 2022 a commerce zirna lam tihhmasawn nana thuthlung an lo ziah tawh bawhzuina kal zel a ni a. He study room ah hian Commerce subject lam lehkhabu hrang hrang te awmin, zirna hmun hma tha tak buatsaih a ni bawk a ni. He zirna hmun hi commerce lam zirlai tawh phawt tana pan theih tura duan a ni a. Adviser to CM chuan CYMA in an building zirna atan phal taka an hmantir chu lawmawm a tih thu sawiin, zirlai ten tangkai taka an hman ngei a beisei thu a sawi bawk.