ZORO in FCAA chungchangah Special Assembly ko a ngaihtuah tha leh turin Sorkar ngen.

Aizawl | Sept 2, 2025: Vawiin September 2, 2025 Zo Re-unification Organisation (ZORO) Office Bearers Meeting chuan Mizoram Sorkarin Forest Conservation (Amendment) Act, 2023 a adopt chung chang ngun takin an sawi ho a, FCA Act, 2023 hian Sorkar laipui thuneihna sang tak a pe a, Section 2 siam that hian ram leilung fate tan harsatna namen lo min thlen ta a ni.

1. FCAA 2023-in Ngaihhnathiam (exempt) tura a dahah hian International boundary atanga km 100 chhung chu Central Sorkarin a duh anga a hman theih turin, state sorkar leh village council/gramsabha, NGO te rawn hauhlo pawha a hman theih turin thuneihna a la a. Forest clearance lak buai ngai hauh lovin hma a la thei a.

2. He FCAA 2023 chuan Indian Constitution Article 371G in kan in humhimna tur a Dan min pek zawng zawng a kalh fai vek a, chanvo min pek a rapbet vek a, Indigenous Peoples chanvo chhuhsakna a ni. FCAA hi Parliament-in a adopt a ni a, Article 371G erawh chu Indian Constitution a ni. Democracy-ah chuan Constitution a lal zawkin thu a nei zawk a ni.

3. FCAA 2023 hian International ramri atanga km 100 thleng thuneihna a nei a, Forest-a puan a nih atangin State thuneihna a lak sak nghal a, Central-in thuneihna a inpe tihna a ni. FRA 2006 in Forest dweller-te dikna chanvo a pek pawh a ti derthawng a ni.

4. FCAA 2023 hian Indian Constitution Article 244 a kalh a. He Article hmanga siam Fifth leh Sixth Schedule in Autonomy leh Right a siam sak ADC, UT leh State chanvo a chhuhsak a ni.

5. FCAA 2023 hian Indian Constitution Article 19 a bawhchhia a, he article in chanvo min pek Freedom of Residence and Settlement, Freedom of Occupation, Trade, Profession te a bawh chhia a ni.

6. India Constitution Article 21-in chanvo min pek-

a) Zalenn taka thuneihna min pek chu a nek chep.

b) Tribal-te ramngawa an eizawnna tur a dang ping nghal bawk a ni.

c) Hriselna tha leh boruak thianghlim kan hmuh theihna tur ramngawte an duh anga an thiah theih avangin weather leh climate thleng pawi nasa tak a thlen thei.

d) Environment nasa takin a tichhe thei bawk.

e) Mi mal tinte dikna chanvo a tichhe thei bawk.

7. Tualto hnamte tana inhumhimna tur UN Declaration on the Rights of Indigenous Peoples Articles 13, 15(2), 17(2), 21(1), 24(1), leh 25 te chu he FCAA 2023 hian nasa takin a bawhchhia a ni.

He FCAA hi Supreme Court-a ngaihtuah lai mek a ni a, Court pawhin final decision pawh a la siam theih loh laia lo pawm ngawt hi a fel lo hle a, nakina Zofate lo awm zel tur hmakhua a tichhe thei dawn a ni. Kan hriat angin FCAA 2023 hian kan fundamental right a bawhchhiat avangin Indian Constitution Article 13 sawi anga he Parliamentary Act hi tihtawp mai emaw, Indian Constitution-in dikna chanvo min pek anga her rem chi niin a lang.

Keini Zo Re-unification Organisation(ZORO) chuan kan ram leh hnam tan a him lo nia kan hriat avangin he Act hi kan pawm thei loa, Mizoram Sorkar hian Central lam beng a thlen hma ngeia ngaihtuah ṭha leh tur leh aṭul anga Special Assembly hial pawh koa ennawn leh turin kan ngen a ni.

Sd-

(LALRAMHLUNA)

General Secretary

Zo Re-unification Organisation (ZORO)

General Headquarter, Aizawl.

[Join WhatsApp channel for updates- https://whatsapp.com/channel/0029Vb66gtL8KMqnoM2JIz12 ]