BSF sipai lak turah Mizo thalai inziak lut an thahnem

Aizawl | Sept 18, 2025: Border Security Force (BSF) sipai lak turah Mizo thalai inziak lut an tam, vawiin chhun dar 12 thleng khan form thehlut 2700 an chuang tawh a, zaninah a la kal mek.

Recruitment President Officer, BSF Aizawl 2IC Narender Yadav chuan, "Form thehluh hun pawhsei a nih dawn lo," a ti a. mahse, "nizan pawh khan dar 9 kan thleng a, zaninah pawh, rawn kal chin chu form an thehluh vek theih nan zanrei pawh nise kan buaipui dawn," a ti.

BSF hi 300 lak tur a ni a, mipa 255 leh hmeichhia 45 an ni. Vawiin chhun dar 12 thleng khan dilna hi 2700 chuang a lut tawh a, a hmunah form thehluh tum an tam hle a ni.

Sipai lakna atana form thehluh hun hi Sept 2 - 18 chhung hawn niin, R Dengthuama Hall, Mualpui, Aizawl-ah kalpui a ni a, Sept 15 hma zawng chuan mi 100 vel chauh an ni thin a, Sept 15 atang khan form thehluh tum hi an pung hluai a, nimin leh vawiin lamah phei chuan buaithlak khawpin an tam ta a ni.