AMCECC-in Regularisation of CSS Employees Scheme, 2024 a taka hman vat an phut!

Aizawl | September 3, 2025: Vawiin dar 11 khan Youth Recreation Centre, Falkland-ah All Mizoram CSS Employees Coordination Committee (AMCECC) chuan State sorkar hnuaia an dinhmun siamthatna tura an hmalakna kal zelah State sorkar atanga thu lawmawm an neih theih loh avangin an kal zel dan tur an relin AMCECC General Body Meeting an nei a, Aizawl khaw chhung bakah Mizoram hmun hrang hrang atangin CSS Employees 1000 chuang an kalkhawm.

He rorel inkhawm hi AMCECC Chairman Malsawmtluanga Hauhnar, Cin kaihruaiin, Regularization of Centrally Sponsore Scheme (CSS) Employees Scheme, 2024 chu CSS Employees ten an la hman theih lohna chhan chingfel tura sorkar lamin hmalakna engmah a neih loh avangin an hmalak zel dan tur atan hetiang hian Resolution an siam.

1. CSS Employees-te’n Regularisation Scheme min siam sak hi kan hman ve ngei theih nan siam rem ngai min siam rem sak tura Sorkarin ngaihtuahna a seng miah lo leh, DP&AR Minister thurawn anga AMCECC in representation ni 19.05.2025 a kan thehluh tawh lehkha min tih bo sak leh a thlenna tur Official hnen a thleng lo hi mak kan ti a. Chuvangin, Regularisation of CSS Employees Scheme, 2024 a taka kan hman ngei theih nan kan representation thehluh hi rang taka min ngaihtuah sak a, min tihhlawhtlin sak turin Sorkar kan phut tlat a ni.

2. Govt. of Mizoram hnuaia thawk, CSS Employees te’n Regularisation of CSS Employees Scheme, 2024 hnuaia department hrang hrang proposal an hnawl zel lai a. CSS pawh ni lo, Health Department hnuaia thawk Health Worker mi 31, MR Skilled II, PE a convert-te, he dan hmanga an dah nghet hi mak kan tiin, induhsakna uchuak hi kan ngaithiam loin tun hnuah thleng tawhlo se kan ti. He appointment hi Sorkarin cancel ngei rawh se.

3. CSS hnuaia thawkte ‘Dan lo ang a lak’ ti a kan Chief Minister zahawm takin, kum 2025 Independence Day lawmna a, a sawi hi na kan ti a, CSS hnuaia thawkte hi dan ang thlap a lak kan ni a, dan lo ang a lak kan awm chuan, dan lo ang a latute chu zawng chhuak a, action na taka lak ni rawh se.

4. Heng a chunga point hrang hrangte hi tih hlawhtlin ngei kan phut a, min tih hlawhtlin sak a nih loh chuan AMCECC General Body Meeting chuan ni 9, 10, 11 September, 2025 chhung hian Mass Casual Leave lak ni se kan ti. Hemi chhunga kan duh anga Sokarin hma min lak sak loh chuan kan kal zel dan tur hi ngaihtuah leh a ni ang.

AMCESS hian CSS Employees ten Regularization Scheme an hman theihna turah harsatna an neih avangin lungawi lohna pawh an lo lan tir tawh a, sorkar nen in bia in, inremna leh CSS ten harsatna an neih te pawh chingfel tura tih anih bakah State sorkar thurawn angin Representation te pawh an lo thehlut tawh a ni. Heng an hmalaknaah hian State sorkar lam atanga thu lawmawm leh innghahna tlak engmah a awm loh avang leh AMCECC Representation pawh ngaihtuah a nih loh avangin hmalak chhunzawm dan tur ngaihtuah hian General Body Meeting neih hi an rel ta a ni. Tunah hian State Sorkar hnuaiah CSS Employees mi 10,000 chuang an awm mek a, Coordination Committee hnuaiah hian Department hrang hrang atangin Association 16 an tel a ni.