Health Minister-in 102 Ambulance Motor pariat vailiam

Aizawl | September 3, 2025: Tukin Dar 9:00 khan Health Minister Pi Lalrinpuii chuan MINECO Khatla atangin NHM hnuaia NAS enkawl, Sawrkar damdawiin-a dah tur 102 Ambulance Motor 8-te chu a vailiam.

Hemi puala hun tawi hmanah hian Health & Family Welfare Department Minister Lalrinpuii chuan thusawiin, mipuite mamawh em em Ambulance thar an nei thei ta chu lawmawm a tih thu a sawi a. National Ambulance Service chu NHM hnuaia programme pakhat, 2013 atanga kalpui tan a nih thu leh Raipuar (Nau neitur) ten thianghlim leh hrisel taka sorkar damdawiin a nau an neih theih te, nausen damlo te damdawiin lama kal lam leh haw lam phur kual zung zung thei tur a Ambulance ruahman te, damlo (Emergency) engkawl hmanhmawh ngai te damdawiina phurh nghal zung zung theihte chu a thil tum ber a ni tih a sawi a. Tunah hian National Ambulance Service, NHM hnuaiah, Ambulance motor 62 awmin district hrang hranga sorkar damdawiin 59 ah te dah an nih thu leh chungte chu NHM hnuaia Call Centre (102) aṭanga darkar 24 chhung enkawl (monitor) an ni tih a sawi a. Ambulance-te chu an lo Service rei ve deuh tak avangin, a tahtawl a a thar thlak tur a ruahmanna siam zel tum a nih thu a sawi bawk a ni.

Vawiina vailiam tak Ambulance-te hi a hnuaia tarlan hmunahte hian pek tura ruahman a ni.

1) Chawngte CHC

2) Sakawrdai CHC

3) Ngopa CHC

4) Bunghmun South PHC

5) Khawbung PHC

6) Tawipui PHC

7) West Phaileng PHC

8) Rawpuichhip PHC

National Rural Health Mission hi kum 2005 ah India ram ah kalpui tan niin, Mizoram ah pawh hemi kum vek hian kalpui ve nghal a ni a. NRHM Programme hi kum 2013 ah National Health Mission tih a thlak niin National Health Mission Programme hnuaiah chuan, thingtlang bakah khawpui (Urban) lam a mipui chengte pawh a huam ta a. NHM hnuaiah hian Committee hrang hrang State Health Mission, State Health Society, Mission Director leh State Programme Management Support Unit-te an awm a ni.

Ambulance vai liamna puala hun hmanah hian Health&Family Welfare Department hnuaia Official-te an tel a. Hun hi Pu H. Lalengmawia, Commissioner & Secretary, Health & Family Welfare Department in kaihhruaiin kalkhawmte lawmna leh NHM nih phungte a sawifiah a. Dr. Joseph Lalluaia, SNO, National Ambulance Service, NHM in Technical Report a pe a. Dr. Lily Chhakchhuak, Mission Director, National Health Mission chuan lawmthu sawiin hun hi a khar a ni.