"ZPM CEM-in fiahna a paltlang hma-a banna a thehluh tak avangin, BJP kaihhruai Sorkar tha tak kan nei thuai dawn,"

Aizawl | August 14, 2025: BJP Mizoram chuan vawiin khan, Partition Horrors Remembrance Day pualin 'Silent March' neiin, ngawi rengin kawng an zawh a, BJP State Office aṭanga ṭanin Vanapa Hall kawt thleng kawng an zawh a ni.

Kawng zawh hmaa 'Partition Horrors Remembrance Day' puala inkhawm an hman-ah BJP Mizoram State President Dr K Beichhua, MLA chuan, LADC-ah, "ZPM CEM-in fiahna a paltlang hma-a banna a thehluh tak avangin, BJP kaihhruai Sorkar tha tak kan nei thuai dawn," a ti.

Dr K Beichhua chuan, "British laka zalenna kan hmuh khan, India ram khan hun khirh tak leh hun harsa tak kan tawk a nih kha, he thil thleng lungchhiatthlâk tak mai hi India Mipui tam tak chuan kan hre tawh lova, Congress Party hian khang hunlaia harsatna kan tawh te kha theihnghilh a, hriat reng ngai an ti lova, Nimahsela, khang hunlaia India ramin harsatna kan tawh kha, theihnghilh mai lova, khang hunlaia mipui tawrhna avanga vawiin thlenga na te tuam dam an nihna tura hmalak dan tur kan hriat phah theih nan leh khatiang harsatna, nunrawng taka chetna ang kha India ramah a thlen tawh loh nan leh kan hriatrengna ni atan, PM Narendra Modi chuan kum 2021 khan August ni 14 hi 'Partition Horrors Remembrance Day' atan a lo puang a, hemi kum vel Kum 2021 aṭang khan hman ṭan a lo ni ta a ni," a ti.

Dr K Beichhua chuan, "India ramin Political Independence hi 1947 ah kan nei a, zalenna kan neihna tur atana sulsutute tawrhna nasat zia leh thisen a luan nasat zia te kha ngaihtuah let leh ila, India leh Pakistan inṭhen a nih dawn khan Religious base-a kalpui a nih avangin Pakistan lama awm Hindu-te chuan India rama rawn luh an duh a, India rama awm Muslim te'n Pakistan lama haw an duh bawk a, nimahsela Hindu leh Muslim te'n an awm duhna lama an haw kawngah chuan inlambunna a thleng nasa in, India ram aṭanga Pakistan-a haw tur Muslim-te chuan Hindu-te lak aṭangin harsatna nasa tak an tawk a, Pakistan aṭanga India rama haw tur Hindu-te chu Muslim te'n kawng lakah an lo lambun bawk a, khatiang a nih avang khan harsatna nasa tak an tawk ve ve ta a ni. Mipui maktaduai 2 vel zette chuan he Partition avang hian nunna an chan phah a ni. Chuvangin, India ramin zalenna kan neih nana nunna chan ta te, Partition avanga nunna hlu tak chan ta te kha he ni a lo thlen hian kan hriat thar leh a ngai a, hetiang ang hun hi thleng nawn tawh lo se, chi leh chi, hnam leh hnam te leh Sakhuana avanga tharum thawhna chhuak ṭhin hian min siam ṭha ngailo a ni tih kan hriat tharna ni lo ni mawlh rawh se," a ti bawk.

Dr K Beichhua chuan, LADC chungchang sawi chhunzawmin, "ZPM CEM chuan fiahna a paltlang hma-a banna a Submit tak avangin, BJP kaihhruai Sorkar tha tak kan nei thuai dawn a ni," a ti bawk.

Inkhawm neih zawh hian hian Partition Horrors Remembrance Day pual hian 'Silent March' neih a ni a, 'Silent March' hi BJP State Office aṭanga ṭanin Vanapa Hall kawt thleng kawngzawh a ni bawk.