"..CM Lalduhoma Peace City sawi hi Pu Zoramthanga Peace Bonus sawi ang mai ni lova a taka ti hlawhtling ngei turin kan ngen. .." - MPYCC

Aizawl | August 14, 2025: Mizoram Pradesh Youth Congress Committee chuan vawiin khan Serchhip Press club-ah thuthar thehdarhtute kawmin, "...CM Lalduhoma'n Peace City a sawi hi Pu Zoramthanga Peace Bonus sawi ang mai ni lova a taka ti hlawhtling ngei turin kan ngen. .." an ti.

Press Statement kimchang:

Mizoram Pradesh Youth Congress Committee

@ Serchhip Press Club, August 14, 2025

 (Ningani)

"...CM Lalduhoma'n Peace City a sawi hi Pu Zoramthanga Peace Bonus sawi ang mai ni lova a taka ti hlawhtling ngei turin kan ngen. .."

 ZPM chuan kum 2023 inthlan dawn khan mipui hmaaah inzuarin nasa takin thu an tiam a. Hei vang hian Mizoram mipui pawhin beiseina sang tak neiin, ‘Min enchhin rawh u,’ an tih ang ngeiin enchhin turin mipuiin sorkarna kan pe a ni. Mipuiin beiseina neia an siam enchhin sorkar anih angin, Congress Thalai chuan ZPM sorkar hi mipuite beisei ang sorkar tha siam a, an intiamna hlen ngei tur pawhin kan beisei sang hle a ni.

  Mipuiin beiseina nena kan thlir mek laiin kum khat leh thla riat vel sorkarna an hman mekah mipui huapzo ‘Kalphung Thar’ sorkar beiseitu mipui beisei an pha lo nasain, beiseitute bei an tidawng nasa hle a ni. Mipui hmaa an that berna leh danglam bik ni tura an intiamna leh inzawrhna te, ti thei dinhmuna sorkarna fung an chelh hnuah pawh an tha bik chuang lo a, an danglam bikna hmuh tur a awm lo. Anni pawhin an ti ve tho tih chu insawi mam nan leh mipui hmaa thiamchan nan an hmang mek a,  hei hi a thlangtu mipui zah lohna leh inbumna lian tak a ni. Hetiang sorkar mahni thutiama ding lo kan neih mek lai hian Congress Party chu insawhnghet deuh deuhin an sorkar laia an thil tha tihah mipui an lungleng leh tawh a, Congress Party-ah haw runpui a thleng leh mek a ni. 

  Kum 1998 khan Congress Party chuan Mizoramah District panga (5) a puan belh a. Serchhip pawh District Headquarters-ah a puang tel anih kha! District-a puan a lo nih takah chuan Serchhip leh a chhehvel khuate tan thil a samkhai em em a, nasa takin hma pawh a sawn a ni. Sorkar Department hrang hrangte dah thar zel niin, District panga an puan zinga changtlung ber chu Serchhip District hi a ni. Congress Party-in he District chhunga hmasawnna a thlen hi District dang tana thik tham niin hmasawnna a zuang nasa hle bawk a ni. Serchhip District huamchhunga Congress Party-in a siam thenkhat chauh lo tarlang ila; Serchhip Auditorium, Serchhip Boxing Hall, Sports Complex, Serchhip Greater Water Supply Scheme, Aklavya Residential School, Thenzawl Ayush Hospital, Thenzawl Horticulture College, Sainik School Chhingchhip, Thenzawl Golf Course, Thenzawl Dilpui & Park te hi an ni. Hetiang anih mek lai hian tun sorkar thara Serchhip rohlu Auditorium, Congress sorkarin cheng nuai 3500 chuang senga sak thiah mai tura thutlukna a awm tih kan hriatin pawi kan ti a, a thlakna tur ruahmanna fel tak a awm a nih loh chuan thiah rih loh hi Congress Thalai chuan a duh hle a ni.

  Serchhip bial hian bialtuah Chief Minister in nei thin hi in vannei kan ti hle a, tunah pawh bialtu atan Chief Minister innei hi bial mipuite kan lawmpui che u a. Mahse,  zeldin thu hrang hrang hmanga insawi hlim chawp hian term in hmang ral mai ang tih erawh kan hlauh pui che u a. Mizoram hmun hrang hrang bakah Serchhip bialah ngei pawh nasa takin tih tur sawiin an inzuar a; Thenzawl mipuite pawh Christian Millionare a hriat te hmanga khawpui thar din sak tur anga insawi kha dawt chiang tak a nihzia a lang chho zel a. Christian Millionare hmelhriat a nei lo tih pawh April 24, 2025-ah Housing and Urban Affairs (AMRUT-IIB) Section Officer-in Mizoram Chief Secretary leh Resident Commissioner hnenah, ‘Shifting of State Capital from Aizawl to Thenzawl, Mizoram’ DPR siamna tur chungchang lehkha a thawnah chiang takin a lang a ni. Hei pawh UD&PA department-in a hnuah khawpui sawn tumna lam a nih loh thuin an pha leh si a. Khawpui sawn hi thil lian tham lutuk anih avangin ruahmanna mumal tak neia Cabinet-in a pawmpui phawt a, State Legislative Assembly pawhin a pawm phawt ngai a ni a. Serchhip bial leh Mizoram mipui hi an hnathawh chhe lutuk leh an inzawrhna ang an tlin lo lutuk laka boruak dang siam tumna maiah Congress Thalai chuan a ngai a. Pu Lalduhoma’n Peace City a sawi hi Pu Zoramthanga’n Peace Bonus a vuah chawp ang ni lova a hlawhtlinna hi Thenzawl mipui leh Serchhip District mipui chauh chhawr tur mai ni lova ram pum mipui tan chhawr nahawm tak an siam theihna tura ti hlawhtling ngei turin Congress Thalai chuan a phut tlat a ni. 

  He bial leh kuthnathawktute tan Pu Lalduhoma leh ZPM hian nasa takin mipuiah tiam an nei a. Lau lui Festival te, Thenzawl College pawh a hmuitu tur thlenga hual tawh angin a insawi a. Puantahtute tan pawha hmasawnna nasat dan tur leh an puantaha QR code tah tel a nih tawh dawn thu thlengin uar takin a sawi a ni. Mizoram pawh Oil lipui chunga awm ang leh hmun thenkhatah phei chuan Gas a put thu leh hlum sawh nawk nawka thuk siama eirawngbawl mai theih anih thu thlengin a sawi bawk. Sorkar inthlahdah avanga kawng chhia mipuiin kan tawrha Petrol leh Diesel a van em em lai hian lei hnuaia awm Oil leh Gas a sawi hi la chhuaka hmala nghal turin Congress Thalai chuan a phut a ni. 

  ZPM sorkar chuan an inzawrhna kuthnathawktute pawisa an la batsak laiin,  Chief Minister chuan motor thar lei tum lo leh motor man toa thu ve lo tura awihawm taka sawi dum dumin mipui hmaah intiam mahse, motor thar an lei mawlh mawlh a, Car manto chhungah a thu leh kuk si Congress Thalai chuan hriatthiam har a tiin, kuthnathawktute a tiam anga tiam liam satliah lova a thusawi ang ngeia a intiamna ti hlawhtling ngei turin Mizoram Chief Minister hi kan phut a ni. 

  Congress Party hi India ram State hrang hrang leh Mizoram chhungah nasa takin tunah a thang mek a. Mipuiin Congress Party sorkar nghakhlelin an au leh mek tawh. Mizoramah pawh harsatna namenlo sorkar in ruahmanna fel fai lo leh mipui hnen thleng phak lo a tam avangin mipuiin enchhin sorkar laka rilru nghah chu beidawn thlak an ti hle tawh. Heng Mizoram mipui beiseina hi Congress Party chuan Pathian leh mipuite zarah nakum Aizawl Municipal Corporation inthlanah leh kum 2028 MLA inthlan puiah a takin kan thlen tir leh dawn a ni.

Issued by : Mizoram Pradesh Youth Congress Committee @ Serchhip, Press Club. 14.8.2025. (Ningani)