LMC hotute leh local council-te'n LMC huam chhunga property tax khawn dan tur an sawi ho

Lunglei | August 14, 2025: Vawiin khan Lunglei Municipal Council (LMC) hotute leh local council ai awhte chuan Lunglei Convention Centre-a LMC BoC Meeting Hall-ah LMC huam chhunga in leh lo chhiah (property tax) khawn dan tur an sawi ho.

LMC Executive Councillor Zorinsanga Hmar chuan ṭhut khawm kaihruaiin, LMC Chief Executive Officer Donny Lalruatsanga chuan thu ngaihtuah turte a sawi fiah a. Property tax chungchanga hma lakna report ngaihthlak niin, local council-te kal tlanga property tax khawn dan tur ruahmanna hrang hrang sawi ho a ni.

LMC huam chhungah local council 24 te kal tlangin property tax hi August ni 20, 2025 aṭangin khawn ṭan ni se, September ni 20, 2025 thleng khawn ni se, tih a ni a. LMC-in property tax pe turte hming bu leh chhinchhiahna bu te, receipt leh thil ṭul dangte buaipuiin, chumi hmang chuan local council lamin khawn se tih niin, harsatna a awm chuan a ṭul angin LMC-ah thlen ni se tih a ni a. Online-a chhiah pe tur hming tar chhuaha siam rem ngai awmte chu LMC lamin lo siam ṭha se, online-a chhiah pete chhiah pekna pawh lehkhaa her chhuah ni se, tih a ni.

LMC hnuaia online hmanga property tax pek tur zat en theihna leh chhiah pek theihna website - property.lmclunglei.com chu June ni 19, 2025 khan tlangzarh niin, mipuiah an chhiah pek tur zat puanzar a nih hnuah August ni 4, 2025 thleng sawi buaina hun hawn a ni a. Property tax hi online-in mi 1,200 velin pe tawhin, LMC office-a kal chilha pe mi 300 vel an awm bawk a. Hemia la pe lote hnena chhiah khawn runpui chu August ni 20 leh September ni 20 inkar chhungin local council te'n an huam chhungah ṭheuh an kalpui dawn a ni.

LMC Board of Councillors (BoC)-in a ruahman danin, mipuiin property tax an pek aṭanga za zela 95 chu mipui tana hman leh vek tur niin, ward committee-ah za zela 80 leh local council kutah za zela 15 a lut dawn a. LMC-in property tax khawnna enkawlna senso atan za zela 5 a chang ve thung ang.