THUDIK LAMAH CHUAN I INHAWNG EM?

_I Khawthlir Dan Thlak_

-Rick Warren

-    Aug 12, 2025

“Ka thua in awm reng chuan ka zirtirte in ni tak tak ang. Thudik in hria ang a, thudik chuan a ti zalen ang che u.”  Johana 8:31-32 (NIV)

 

Kum 55 liamtaa ka chanchin hi ka hrilh ang che u. Tlangah camping kan nei a, pindanah ka inkhung a, ka thingthi a, tawngtaina mawlte in ka tawngtai a. Hetiang hian ka chham a ni:

“Lalpa, Pathian i awm anih chuan, i tan ka inhawng e. I awm anih chuan, i awm a ni tih hriat ka duh. Isua Krista, ka nun i thlak danglam thei anih chuan - nun duhawm zawk min pe thei dawn anih chuan - ka nun hian damchhan a nei anih chuan hriat ka duh a ni. Lalpa i awm tak tak anih chuan, keimahah hian i awm tak tak a ni tih min hriattir rawh.”

Chumi hnuah chuan engnge lo thleng? Engmah

Eng eng mahin min chhun lo va. Vantirhkoh an lo kal hek lo. “Halleluiah Chorus” sa ri pawh hriat ka nei hran lo. Engmah a lo thleng lo. Ka kawchhungah engmah danglamna a awm lo. Ka zauthau bawk hek lo. Ka awmdan pangngai ang tho khan ka awm reng a ni. 

Nimahsela chu chu ka nunah danglamna a thlenna a ni tlat. Engvangnge? Pathian tan ka inhawng tlat a ni. Pathian dem duhna ka nei tawh lo a ni. Hun remchang a awm anih phawt chuan thudik chu hriat chakna ka nei ta a. Chu chu ka nun inthlak danglamna a ni.

Rilru lama lo no viau a ngai hran lo. Mawlmang taka ngaihtuahna sen leh thutlukna siam a ni mai: Pathian chu a awm anih chuan, hmuh loh chu ka duh lo a ni. Ka tan hian tum a nei a nih phei chuan, chu pawh chu bawhpelh ka duh lo a ni. Pathian va sawisel emaw va dem emaw ai chuan alama rilru inhawn chu ka duh zawk a ni. 

Engnge i an ve le? Pathian lakah i rilru a inhawng em? Ringtu ni mahla, i rilru chu Pathian thudikah chuan a inkharkhip tlat thei a ni. 

Nimahsela Pathian laka inhawnna chuan, “Pathian thudik chu thildang zawng zawng aiin ka duh. Hrehawm dawn mahse Pathian thudik chu ka duh fan a ni,” tiin. 

Tunlai postmodern khawvelah chuan thudik kan hre thei tawh lo an ti thin. Bible zirtirna erawh chu chutiang a ni ve lo. Thudik chu kan hre thei em? Thei e. Isuan hetiang hian a sawi, “Ka thua in awm reng chuan ka zirtirte in ni tak tak ang. Thudik in hria ang a, thudik chuan a ti zalen ang che u.”  Johana 8:31-32 (NIV)

Pathian lamah i rilru a inkharkhip pawh a ni maithei e. Anihloh vek pawhin Kristian nisi Pathian thudik lama inkharkhipna lai nei pawh i ni maithei a ni. Vawiin hi Pathian lamah i inhawng a ni tih Pathian hriattir hun a ni. Zalen hun a ni.

Ngaihtuah zui atan

* Eng kawngah te nge Pathian lamah i rilru i hawn le?

* Eng kawngah te Pathian thudik lamah chuan i rilru a inkharkhip tlat le?

* Pathian thudik lama i rilru hawn chu i duh em? I duh anih chuan tawngtai rawh.

*[Lettu: Sangpuia]*