'Wa Wa Angel'

byAdmin — 0
- maro colneya bungsut


Kum 12 vel kha kan nih tawh ka ring. Aizawl lama lehkha zir thiante kha an lo haw a, Sap hla kha an rawn thiam zel mai. Kan thianpa RC-a sap hla thiam lama rual awt lutuk pawhin, "Aizawlah kum khat tal awm ila, sap hla ka va thiam hnem dawn tak," a ti vang vang mai. Khatiang khawp khan Sap hla thiamna lamah rual kan awt a ni ngai a.

Thianpa RC-a chu inrinni zing khat chu kan inah a rawn kala, "Vawiinah ka pa Ramhminga tape-ah sap hla ngaithla ila," a rawn ti a. Awm ni kham meuh chuan sap hla kan ngaithla dawn chu a ni ngei mai. Chutiang taka sap hla thiam chak chuan tape hmaah chuan kan thu a, sap hla chu ngaihthlak tum chuan kan in ring tan ta. Thianpa in hlathar nia a sawi, "Smokie hla, 'Wa Wa Angel' tih chu a hla thu i copy teh ang," a ti ta mai a.

Kan venga sap hla thiam hnem ber U Achhuana pawn a ziak a nei del dula, 'Wa Wa Angel' erawh hi chu ala neih kan ring lo. Ziakna lehkha puan kan in chhawp hnai sauh sauha, sap tawng thiam lamah pawh mizo sikul atanga pawl ruk failed dun zak zak tawh chuan engtin nge kan ziah chhuah dawn ni teh reng ni.

Music a rawn ri a, ziakna pen kan hum nghet sauh sauha, tape chu a zai tan ta, a lam ber kan hriat dan a in ang thei lo nghal pang mai. Kan rewind leh a, kan han ngaithla ren rawn a, a lam dan dik nia kan hriat chu kan han sawi dun a, hetiang hian ngaihdan kan siam thiam ta-

"Don tawk tu me, seters rims.
Of kross you don no, uat at me..."

Saptawngah 'tawk' tih a awm hian ka hre si lo. Chu mai a ni lo, 'tu' tih pawh hi thianpa hian a dik ang. Sap ho hian Greek tawng atangte hian thumal an la khawm ve nasa thin, a ti a. 'Seters rims' tih hi chu a awmzia hre lo mah mah ila, ka ngaih a tha thei chuang lo. "Of kross you don no, uat at me" tlem chuan saptawng a ang deuh... 'uat' tih hi ka hrethiam lo. Mahse, thianpa hian, "Sapho pawh hian 'tawng upa' an hmang fo," a ti. Kan han ngaithla chianga, 'uat at me' chu a ti ngei mai si.

A bul atang zai kan play a, kan han zaipuia, kan ziah nen chuan kan phun rem tlap mai bawk sia. A dikah kan ngai hmiah mai. Kan ziah belh leh ta a.

"Tu lif some one ess you can zats teks..
Ooo one year bitten bat the thuf..."

Vawi sawm chuang kan rewind hnu pawh chuan 'Tu lif some one ess you can zats teks' a ni ta ber hian kan hria. Vawi tam kan thai chhia a, hla changkhat ziah nan lehkha phek pawh a hek duh ang reng. 

'Ooo one year bitten bat the thut' he thu ngat phei hi chu a sa tupa pawh hian a lam thiam chiah lo hian kan hria. A ni aiin kan lam leh ziah dan hi a chiang mah zawkin kan hre nghe nghe. Mahse, 'zats teks...' tih lai hi saptawng a ang thei hian ka hre lo. Mahse, a tawpa 's' a awm avang hian tlem chuan ka ngaidam thei deuh. 'thuf...' tih lai hi mak ka ti. Sap pa zai nen han ngaihthlak chuan a dik leh thlap si.

"You bam i on you miss pen iuf..
You neva sim to lan by you miss take...

Inrintawkna kan nei ta deuh. Kan hriat dan chu a dik viau mai. Hla kan ngaihthlak atang 'you' tih hi chu kan hre chiang viau. Mahse, 'bam' tih hi engtihna nge niang le. Lehkha dena 'bam' an tih ang chi a ni loh vek pawn mipa in hmeichhia an va 'bam' kan tih ang chi hi a ni mai thei. Tin, 'iuf' tih pawh hi enge awmzia. Thianpa hriat dan a ni miau mai sia.

'Neva' tih pawh hi enge niang le? Bible-a Nivevi khua in sual an sim kha sap hla hian a rawn sawi a nih ka ring deuh ber. 'Ninevi' sawi nan 'Neva' a hman zawh hunah 'sim' tih hi an sak zawm a ni thei. "Smokie pawh hian Pathian hla an lo sa ve tho a nih hi," kan ti ta vel mai mai a.

A chhan chu a zai kan ngaithlak leh a thu kan ziah a in mil viau thin... A thunawn kan thleng dawn ta. Music uar fahrana a rawn kal chuan min ti phur ngang mai.

"Saw don tawk tu me, Wa wa angel...
Wa wa angel on the sikhai wai,
oooo wa wa angel on the khaiwai of dek light.
Kross the people like you, neuva nu..
What wa wa angel safe to face..

'Wa wa' tih lai tak hi engtia ziah tur nge kan hrethiam mai lo. Wai wai a sawi tumna a nih kan ring a. Mahse, 'Angel' tih a awm leh si. Angel ten 'Wai wai' an ei a niang, a han ti deuha. Kei chuan a nih ka ring lo. 'Wa wa' tia ziah a tha zawk. "Mizote pawn hlathu lam fiah vak loh an nei tho a. 'Bang ziak in a' tihte pawh kan nei," ka tih hnu chuan 'wa wa' tih chuan thu kan keuh thlu kha a ni. 'Saw' tih a hi chu kan zirlaiah a awm avangin Mizotawng ang ni mahse kan ngaidam hmiah.

'Sikhai wai' hi a buaithlak. JF. Dictionary kan han keu ve ngial a. 'Sikhai' tih a awm lo. A vang viau. Mahse, dictionary siam tawh hnu emaw, sap tawngah pawh a tawng upa lam chi a nih kan ring. Kan play nawn a... 'Sikhai' chu a ti ngei alawm. 'Wai' a tih lai hi chu thil han tihpalh a Mizote pawn 'uai' kan han tih thin ang chi a nih kan ring. Mizo chauh lo pawh hian 'uai' tih hi kan lo hmang a nih hi....kan ti ta a.

'...khaiwai...' tih hi hriatthiam ahar. Kei pawn tih ngaihna tak ka hre bik lo. Sap ho hian hla thu an lam chiang peih lo hi a buai thlak kan ti dun khawp mai. Tin, 'neuva nu...' tih hi mak leh zual. A mizo tawng deuh hian kan hria. Mahse, sap ho hian kan mizo hlathu thenkhat hi nalh an ti anga, an rawn telh ve a niang, te kan ti a. Mahse, 'neuva nu' tih ber kher an han dah hi kan hrethiam zo chuang lo.

Chang khatna ka ziah chhung ngawt ang chuan ka la mar thiam ta deuh. Hetianga kan tih chhung hian chawhma chanve a liam tawh. Thingpui kan han in a, a bul atang kan han play nawn leh a. A dik thei ang ber chuan kan sak pui thei ta. Hei bak bak hi chuan U Valpuiate pawn an thiam kan ring lo. Aizawla kal kher angai lo. Entawn loa sak thiam chiah a ni kan zir tawh. Chang khat leh thunawn chauh pawh hi kan thiante bulah sa ila, intihtheihna tham a tling tawh tlat.

Kan han ngaithla zawma, thianpa hian, "Sap ho hi an phakar," a ti leh ta tlat pek a. A tihna chhan pawh an hla thu a in ang put puta, angai hlir an sa, a ti. Hlaziak en lo chuan chawhma chhung chuan kan sa thiam nghal mai.

Kan venga sap hla thiam intite bulah ka va sa chak tawh tak em... rilru lama hausa inti tak chung chuan in lam ka pana, chhun chaw ei laite chuan ka sap hla thiam thar chu ka sa a. Khawvel hi a nuam nawn leh thin.


(Don't talk to me of shattered dreams,
Of course you don't know what it means,
To live for someone else, you can't just take,
And when you're bitten by the truth,
You blame it on your mis-spent youth,
You never seem to learn by your mistakes.
So don't talk to me of wild wild angels,
Wild wild angels on the skyways,
Those wild wild angels on the highways of your life,
'cause it's people like you who never knew,
What wild wild angels have to face.)



Tags:

Post a Comment

He post chungchanga i ngaihdan lo sawi ve rawh:

Post a Comment

He post chungchanga i ngaihdan lo sawi ve rawh:

Previous Post Next Post