NGAIHDAMNA MAMAWH VE THO I NIH AVANGIN MIDANG PAWH NGAIDAM VE RAWH

_I Khawthlir Dan Thlak_

- Rick Warren

- Aug 26, 2025

Inkhawngaih tawna lainatna neiin awm ula, Pathianin Kristaa a ngaidam che u ang bawkin inngaidam tawn rawh u.” Ephesi 4:32

Ngaihdamna hi kawng hnih nei a ni. Midang i ngaihdam theihloh chuan ngaihdam i nih inring bik suh. Chu chu Bible-a kan hmuh dan a ni. I theh apiang i seng ang.

Bible chuan, “Inkhawngaih tawna lainatna neiin awm ula, Pathianin Kristaa a ngaidam che u ang bawkin inngaidam tawn rawh u.” Ephesi 4:32

Vawi khat chu John Wesley, kum 1700 chhova thuhriltu ropui tak bulah hian mi pakhat a lo kala, hetiang hian a rawn sawi a, “Kha pa kha ka ngaidam ngai lo vang,” a ti a. Wesley-a chuan, “Thil sual ti ngai miah lo i nih ka ring. Mi i ngaihdam theih loh chuan, nangmah ngei ina ila zawh tur lei i hal kang vek ang a ni,” a ti a ni.

Midang i ngaihdam loh chuan, nangmah ngei pawh inngaidam lo turin i rilru i siam tihna a ni. Engvangin nge? Pathian chuan i hmalam hunah ngaihdamna ila mamawh dawn a ti che a ni.

Miin an ngaihdam theih loh thu an sawi hian, ngaihdamna chungchang an hriatthiam loh vang niin ka ngai a ni. Ngaihdamna hi hrethiam ta sela chuan, midang ngaihdam chu an chak hle zawk ang. Ngaihdamna kawng daltu engemaw zat an awm ve a. Ngaihdamna chungchang kan ngaihdan dik tawk lo kawng thum kan sawi dawn a ni.

Ngaihdamna chu hetiang hi a ni lo:

*Thildiklo kan ti te tihna a ni lo.* Ngaihdamna chuan, “thil lian tham a ni hlei nem” emaw “Mi a tina chuang lo” emaw a ti lo va. Thil lian tak a ni. Mi pawh a tina. A hliam che a, chuvang tak chuan i ngaihdam a ngai a ni. Mi i ngaihdam avang khan an hliamna che kha a na lo tihna a ni lo.

*Kan rinngamna chu kan nei let nghal tihna a ni lo.* Ngaihdamna leh inrinngamna hi chu a dang daih a ni. Ngaihdamna hi vawi leh khata tih nghal theih a ni. Inrintawnna nei tur chuan hun engemaw chen nghah a ngai thin a ni. Miin an tina nawn fo che anih pawhin, Bible chuan ngaidam tho turin a duh che a. Nimahsela ring nghal tur chuan a ti lem lo che a ni.    

*Inzawmna neih leh nghal tur tihna a ni lo.* Ngaihdamna chu inzawmna siam nen a inang lo. Ngaihdamna chu i nat pawha i tih tho tur a ni a. Nimahsela inzawmna in nei leh dawn anih chuan a tisualtu chuan thil pathum tihtur a nei a: Simna tak tak, zangnadawmna pek leh rintlak ni tura beih te hi an ni. 

Nangmah tina tu che chu ngaihdam hun a ni. Nakinah mi ngaihdamna ila mamawh ve dawn si a. Midang ngaihdamna ila mamawh dawn avangin, ngaihdamna chu ti khawtlai reng reng suh. 

   

Ngaihtuah zui atan

* Ngaihdamna ni lo kawng thumte kha en let la. Eng ber kha nge zawm harsa i tih?

* Ngaihdam hnuah engtin nge inrintawnna in siam leh ang?

* Vawiinah hian tu hnenah nge ngaihdamna i puan ngai le?

*[Lettu: Sangpuia]*