Saitualah District Red Ribbon School Quiz competition nei

Saitual | August 26, 2025: Vawiin khan Mizoram State Aids Control Society leh District AIDS Prevention and Control Committee tangkawp buatsaih District Red Ribbon School Quiz Competition chu YMA Zawlbuk, Keifang Venghlunah neih a ni a, DAPCC Chairman, District Bawrhsap ni bawk Dr. Lalngura Tlau chu khuallian niin hun a hmanpui. Vawiin quiz competition-a lawmman pakhatna latu Oxford English School chu State level-ah District aiawhin an chhuak dawn a ni.

He hunah hian khuallian Dr. Lalngura Tlau chuan thu sawiin, District Red Ribbon School Quiz competition hlawhtling taka buatsaih a ni chu lawmawm a tih thu a sawi a, MSACS, DAPCC, zirlaite, zirtirtute leh nu leh pate thawhrimna rah a ni, a ti. Bawrhsap chuan Mizoram chu India ramah pawh HIV AIDS kai tamna kawngah state dang aiin kan sang hle tih a sawi a, MSACS te chu khawtlang leh kohhran te thawhpui a, tha thlah loa hma lak chhunzawm zel a tul a ni, a ti.

Dr. Lalngura Tlau chuan Saitual District-ah pawh HIV vei te tana inenkawlna ART leh a enkawltu doctor te pawh an awm tawh tih a sawi a, a vei tawh ten damdawi an lak that chuan an a kaidarhna kawngah an veng thei tih a sawi bawk. Bawrhsap chuan zirlaite chu HIV laka an him theih nan mipat hmeichhiatna leh ruihhlo hman sual kawngah te fimkhur turin a chah a, State Level-a Saitual District aiawh tur school te chu a duhsakna sang ber a hlan nghal a ni.

Dr. Zothanpari Chhakchhuak, Sr MO pawhin thu sawiin, HIV AIDS chu mipat hmeichhiatna atang leh hriau thianghlim lo inhman tawm atang an kai darh nasa ber tih a sawi a, hemi kawngah fimkhur turin kalkhawmte chu a chah a ni. Sr MO chuan zuk leh hmuamin cancer a thlen theih thu sawiin, zirlai naupangte chu an taksa hriselna ngai pawimawh a, zuk leh hmuam laka fihlim turin a chah nghal bawk a ni.

Vawiin Quiz competition-a quiz master te chu Pi Liansangpuii, Asst. Professor, Govt. Saitual College leh Dr. C. Lalthangliana, Asst. Professor. Govt. Saitual College te an ni a, khuallian Dr. Lalngura Tlau, Pu Laldingliana, DEO leh Dr. Zothanpari Chhakchhuak, Sr. MO te chuan thu an sawi a, Dr. Tlansangzela, MO, ART chuan lawmthu sawinain hun a khar a ni.

Quiz Competition neih zawh taka lawmman dawn dan chu:-

1st- Oxford English School

2nd- Lailak Secondary School

3rd- Govt. Phuaibuang Middle School-II

Consolation Prize hi New Millenial High School hnenah pek niin, school dang zawng te chu participation certificate pek a ni.

District Red Ribbon Quiz Competition-ah hian Saitual District chhunga school 11 te an tel a. Pakhatna hi State level-ah District aiawhin an chhuak ang a, State level-a pakhatna hi Sikkim-ah Regional level-a inel tura chhuak lehin, chumi an paltlang chuan National level inelnaah an chhuak leh dawn a ni.

Ads:

Modern Industry, Chaltlang

Steel Fabrication, Stainless Steel Fabrication

(Steel hmanga siam chi bungrua leh hmanrua hrang hrang kan siamsak thei.)

Contact: +919612327177

[Join WhatsApp channel for updates- https://whatsapp.com/channel/0029Vb66gtL8KMqnoM2JIz12 ]