NESO bultumin NE pumah dan lova B'deshi lo lutte hnawhchhuah phutin pungkhawm dawn; Mizoram-ah pawh zawm ve dawn

Aizawl | August 11, 2025: North East Students Organisation (NESO) huaihawtin NE pumah dan lova B'deshi lo lutte hnawhchhuah phutin an pungkhawm dawn a, he thil hi Mizoram-ah pawh Mizo Zirlai Pawl (MZP) huaihawtin zawm a ni ve dawn.

Bangladesh Illegal immigrants te lo thliar a, lo hria a, hnawhchhuah phuta SIT IN PROTEST hi MZP huaihawtin Vanapa hall kawt-ah an zawm ve dawn a ni.

August 6, 2025-a North East Students Organisation (NESO) meeting chuan North East State-a Bangladesh atanga pem lut tam lutuk chu ngun takin an sawiho a, India Home Affairs pawhin heng ho hi State sorkar ten lo endik a, hnawtchhuak zel tura thu a pek hnuah Assam tih loh State sawrkar dang ten hma an lak chak loh em avangin NESO chuan North East State hrang hrang-ah August 18, 2025 (Thawhtanni) hian SIT IN PROTEST neih theuh nise tiin a rel a, hemi ni hian State Chief MInister (CM) theuh hnenah memorandum theh luh theuh ni se a ti bawk a. NESO chuan hemi ni vek hian Home Minister leh Prime Minister hnen ah memorandum hi a theh lut ve dawn bawk a ni. Protest hi State sorkar theuhin Bangladesh Illegal immigrants te lo thliar a, lo hria a, hnawt haw tura phutna a ni.

He thu hi MZP General Headquarters chuan vawiin tlai dar 3 khan an rel a. Hemi rual hian, NESO-in a lo rel tawh, State tin a zirlai pawl ten UPSC coaching kal tur candidate pahnih theuh, an state theuhah thlang chhuak se, tia thu an dah chu an ngaituah a, NESO duh dan hi tihhlawhtlin ngei nise, a tul angin MPSC lam thawhpui nise an ti a, chuta state aiawh tur thlan chhuah te hming chu NESO-ah August 25 ral hmain theh lut turin an ti.

Heng thlan chhuah te hi NESO hmalakna in DELHI NEXT IAS Institute-ah Coaching kalin, Admission leh Coaching Fee zawng zawng hi NESO in a tum vek dawn a, tin Stipend pawh thla tin Rs.12,000 a pe ziah dawn bawk. Candidate-te Transportation senso erawh anmahni an intum tur a ni a, stipend an dawn hi an duh chuan, Accommodation leh Food-ah an hmang thei dawn a. Coaching Class hi September 1, 2025-a tan tur a ni. Hetiang lama tui chuan, August 18 ral hmain MZP Pisa Pui-ah ngaihven theih a ni.

[Join WhatsApp channel for updates- https://whatsapp.com/channel/0029Vb66gtL8KMqnoM2JIz12 ]