CM-in UD&PA hotute Thenzawl Peace City hmalakna sawipui

Aizawl | August 11, 2025: Chief Minister Lalduhoma chuan vawiin khan a office-ah Urban Development & Poverty Alleviation (UD&PA) official pawimawhte kawmin, Thenzawl Peace City Master Plan siamtu tur zawnna kalpui meka an thlen chinte a sawipui. Chief Minister hi Commissioner & Secretary to CM Vanlaldina Fanai-in a tawiawm.

UD & PA Secretary Lalmalsawma Pachuau chuan, thla liam ta July ni 22 a Master Plan siamtu tur zawnna hmahruai Request for Proposal for selection of Consultant an tihchhuah thu leh company lian tak tak sawm leh pariatten an rawn ngaihven thu a tarlang a. Heng Pre Bid Queries rawn nei zingah hian khawvel huapa company thate pawh an tel thu a tarlang.

Ruahman anga thil a kal chuan tun September thla tir hian a thawktu tur thlanna hi neih fel hman tum a ni a, October thla atangin hna an tan ang a, tun sorkar kum chhungin Master Plan pawimawh zual chu peih fel hman an tum ang.

Kan tarlan thin tawh angin mipui nuaih 10 vel chen theihna tur khawpui changkang (Modern sustainable, inclusive & planned city), Thenzawl Peace City din tumin sawrkar chuan hma a la mek a. Ministry of Housing & Urban Affaira (MoHUA) chuan Master Plan siamna tur Rs. 10 crore a rawn pe tawh a ni.