Lungleiah rulhut hlo pek runpui 2025 thawh hnihna buatsaih

Lunglei | August 11, 2025: Vawiin khan Lunglei District pum puiah kum 2025 atana rulhut hlo pek runpui thawh hnihna, National Deworming Day (NDD) 2025 August round buatsaih a ni a. Govt High School, Chanmari, Lungleia he ni puala a hawnna hun buatsaih chu Lunglei District Additional Deputy Commissioner Rochuangkimi Khenglawt chuan khuallian niin a hmanpui a, zirlai naupang ṭhenkhat rulhut hlo (Tablet Albendazole) a eitir.

NDD 2025 August round hawnnaah hian khuallian Rochuangkimi Khenglawt chuan naupang kum 1 - 19 inkarte rulhut laka ven nan National Deworming Day chu India ram pumah kum tin ṭum hnih hman a nih thu a sawi a. Zirlai thiam thei leh rilru chak ni turin taksa hrisel a pawimawh tih sawiin, hrisel turin thianghlimna ngaih pawimawh a ṭul tih a sawi a. Rulhut pai lo tur leh taksa hriselna atan kut sil fai ṭhat te, mahni taksa leh chenna in leh a vel vawn fai te, thlai leh thei ei tur sil fai ṭhat leh tui thianghlim chauh in te a pawimawh tih sawiin, zirlaite chu faina leh thianghlimna nunpui turin a chah.

He hun hi Lunglei District Education Officer Micky R Lalenkawla'n a kaihruai a. Lunglei District Immunisation Officer Dr Christina Zonunmawii chuan mihring tana rulhut ṭhat lohzia leh rulhut hlo ei a pawimawhzia sawiin, rulhut pai lo turin kum khatah rulhut hlo vawi hnih tal ei a ṭhat thu a sawi a. Sawrkarin naupang kum 19 hnuai lam tan kum tin ṭum hnih a thlawna rulhut hlo a pek thu sawiin, naupang kum 2 hnuai lamte chu Albendazole mum chanve pek ṭhin an nih thu leh kum 2 leh 19 inkar chu mum khat pek ṭhin an nih thu a sawi a. Govt High School Headmaster Pu Lalsangkima pawhin thu sawiin, Lunglei Child Development Project Officer R Lalhmingliani'n lawm thu sawiin hun a khar.

NDD 2025 August round-ah hian Lunglei leh Hnahthial District chhungah kum 1 - 19 inkar rulhut hlo pek tur target 56,358 awmin, sawrkar sikul, mimal sikul leh anganwadi centre-ah te rulhut hlo hi pek vek tum a ni a. Vawiin khan District chhunga school, college leh anganwadi centre-ah rulhut hlo hi pek niin, school kai lote chu ASHA-te'n an inah kal chilhin an pe bawk a. Target zinga tel si, vawiina pek hman lohte tan August ni 18 khian thual nawn ni, mop up day buatsaih a ni ang.