Naktuk atangin Mizo Idol tan dawn, tel tumte tan video thehluh theih!

Aizawl | August 14, 2025: Mizo Idol Season 8-naa tel tumte tan naktuk atangin Telegram hmangin an zai lai video theh luh tan theih a ni.

Zonet buatsaih Mizo Idol Season 8-na chu naktuk atanga tan a ni dawn ta a, Mizo Idol-a tel tumte tan Application form lak chhuah ngai lovin, Virtual Audition neih tur a ni a, tun thla tawp, August ni 31 thleng mahni zai lai video hi theh luh theih a ni ang.

Mizo Idol thlanaah hian kum 15 atanga kum 30 inkar, Mizo hla sa thei tawh phawt chu a duh apiang tel theih a ni a. Virtual Audition-a mahni zai lai video theh luh turah hian Mizo hla chang khat leh a thunawn, a hânga sak tur a ni a, vawi khat record-ah a tluana sak tur a ni a. Hla record nan hian Phone Camera hman tur a ni a, a tluana record tur a ni. Video leh Audio khawih danglam, edit phal a ni lo a, Video quality chu a tha thei ang bera record tur a ni a, a theih hram chuan Audio fiah tha, a background-a thil dang lang lo leh room eng tha te ngaihpawimawh ni se. A remchang a nih chuan Tripod emaw Mobile Stand emaw hman tur a ni.

Video theh lut tur chuan an zai tan hmain an hming, veng leh khua an sawi hmasa tur a ni a; Video rualin an nihna tichiang turin Aadhar card emaw Voters ID emaw Driving License emaw thawn tel tur a ni a. India khua leh tui ni lo tan pawh Mizo Idol-ah hian a tel theih a, an kum zat tihchianna ID an neih a ngai thung a ni.

[Join WhatsApp channel for updates- https://whatsapp.com/channel/0029Vb66gtL8KMqnoM2JIz12 ]