GAC kum 50na puala buatsaih Inter HSS Dance Competition 2025-ah Synod HSS an lam thiam ber!

# Synod Higher Secondary School an lam thiam ber!

Aizawl | August 14, 2025: Government Aizawl College Golden Jubilee lawmna kal zelah ni thum chhung awh LBS Suzuki Inter Higher Secondary School Dance competition chu ni 11 leh 12-a an inel tawh hnuin vawiin khan Govt. Aizawl College Basketball Court, Mualpui Campus-ah a hmawr bawk fel a ni.

He inelnaah hian Higher Secondary School sawm (10) telin Chheih lam leh Western dance hmangin an inel a, Synod Higher Secondary School te chu pakhatna niin, Govt. Mizo Higher Secondary School te chu pahnihna an ni a, Synod Higher Secondary School te chuan instagram-a like dawng tam ber niin people's choice lawmman an dawng bawk.

He inelna kharnaah hian Aizawl South II bialtu MLA, Govt. Aizawl College alumni ni bawk, Lalchhuanthanga chuan khuallian nia hun hmanpuiin GAC-in kum 50-na a lawm thei chu a lawmpuiin a lawmna atana an hun hman hrang hrangte pawh ṭha a tiin entawntlak a ti a. Mizo culture-a bet tlat, làm chu Mizote’n World Record kan siamna a ni bawk a, hnam lam chawi nung zel tur leh duhthlanna dik siam a, eizawnna dap thiam turin zirlaite chu a chah bawk. Khuallian hian Govt. Aizawl College hnenah sum fai cheng sing nga (₹ 50000/-) a hlan bawk.

Govt. Aizawl College hi kum 1975 aṭanga din ṭan niin kumin 2025 hian an kum sawmngana(50) lawmna'n Inter College Basketball tournament te, National Level Seminar te bakah department hrang hrangin luan-chhuah/give back hun te an lo hmang tawh bawk a, August ni 25 hian Foundation Day hmangin, October thla tawpah Jubilee Grand Celebration nei turin an inpuahchah mek bawk. Tunah hian BA, B.Com leh MA (Education) awmin, zirlai zawng zawng 1940 an awm mek a ni.

Lalchhuanthanga MLA chuan, Govt. Aizawl College Principal leh Staff te, Organising Committee leh zirlaite Golden Jubilee lawmna kal zel pakhat lam intihsiakna a tel ve tura min sawm avangin in zavai chungah lawmthu ka sawi a, in kum 50 tlin hi thinlung takin ka lawmpui hle bawk che u a ni. In College in co-curricular a ngaih pawimawh zia leh a taka kalpui kawngah pawh ti tha ber pawl in nihna vawiin a kan hmu leh hi ka lawm hle a, lam hi music rik ruala insiksawi kual vel mai a ni lo a, tawng chikhat tiin an sawi thin. Kan hnam ziaa bet tlat a ni a Mizoram-in World Record kan neihna pawh Cheraw a ni nghe nghe a, hnam zia rang leh generation hrang hrang min zawmkhawmtu kan ti lo thei lo a ni.

Ka sawi hmaih phal loh chu Huiva Cultural Club te in ni a, in lam a hmuhnawmin in thiam hle mai a, Sawrkar Official programme hrang hrang leh vairam lamah pawh sawm hlawh pawl in ni hi in thawhrimna leh inpekna a ni a, hei aia dinhmun sang zawk thleng zel turin duhsakna ka hlan mawlh mawlh a che u. Govt. Aizawl College kum 50 tlin ka lawmpui zia lantir nan leh hriatreng nan (Government Aizawl College Official Music Video) hmasa ber tur siamna hi ka tumsak dawn che u a ni tih ka puang nghal bawk e.

A tawp berah chuan vawiin a thalai rual kalkhawm te hi hlim rawh u, nui rawh u, nuam ti rawh u mahse chumi intihhlawhtlinna kawng in thlannaah khan fimkhur thiam rawh u; induhthlanna khan khawi hmun nge a thlenpui dawn che u tih ngaihtuah chungin, in kalkawng thlang thiam ru tih hi ka chah duh che u a ni. Govt. Aizawl College kum 50 tlin ka lawmpui mawlh mawlh che u a, kum 50 dang thiamna run Mizoram mipui tan malsawmna ni zel turin duhsakna sang ber ka hlan a che u a ti.

Chawhnu Dar 12:30 khan India hnam puanzar pawt pharhin bul tan a ni a, dar 1:30 khan Final Competition hi tan a ni. Higher Secondary School zingah final lut hi School paruk an awm a, chungte chu :

1. Govt. Mizo Higher Secondary School

2. Synod Higher Secondary School

3. Springfield Higher Secondary School

4. Greenland Higher Secondary School

5. Govt J.L Higher Secondary School

6. St. Joseph Higher Secondary School