LADC CEM-in fiahna paltlang hmain banna thehlut!

Aizawl | August 14, 2025: LADC CEM V. Zirsanga chuan a sorkar floor test vawiina neih tur chu vote lak a nih hmain CEM aṭanga banna a theh lut.

Nimina tarlan tawh angin, Lai Autonomous District Council (LADC) Chief Executive Member (CEM) V Zirsanga'n sorkarna siam tura thlawptu mamawh zat a neih leh neih loh fiahna a paltlang dawn a, vawiin hian fiahna neih tur a ni.

Fiahna neih tura thutkhawm hi LADC Chairman T Zakunga chuan nimin khan kohna tichhuakin, vawiin August 14 10:30 hian LADC Session Hall, Lawngtlai-ah thukhawm turin a ko a ni.

Hetia CEM in banna a theh luh tak avang hian floor test neih tura koh tawh pawh, neih a ni dawn ta lo a ni.

V. ZIRSANGA CEM, LADC-IN GOVERNOR HNENAH A BANNA A THEHLUT

August 14, 2025: Vawiin chaw hma dar 10:30AM khan LADC Chairman Pu T. Zakunga kaihruaiin, Lai Autonomous District Council Session vawi 11-na neih a ni a. He session-ah hian Mizoram Larsap-in LADC a sorkarna fawng vuan mektu, Pu V. Zirsanga, CEM sawrkar fiahna (vote of confidence) nei tura thu a pek angin Ou V. Zirsanga kaihhruai sorkar rin tawk lohna hun neih tur anih laiin Pu V. Zirsanga hian vawiin chawhma dar 10 khan Governor hnenah Chairman, LADC kaltlangin banna a thehlut a, No Confidence motion hi neih a ngai ta lo a ni.

LADC a Chief Executive ni lai, Pu V. Zirsanga banna hi Pu T. Zakunga, Chairman, LADC chuan House-ah chhiarchhuakin Pu V. Zirsanga kaihhruai (ZPM) sorkar chu a tla tih a puang a, session pawh tiamchin awm lovin a titawp nghal a ni.

February ni 24, 2025 khan Pu V. Zirsanga hi LADC CEM atan ruat a ni a, Governor chuan ni 30 chhungin House-ah member a ngah tâwk em tih fiah turin a hriattir zui a. Mahse, fiahna neih theih a ni lova. Hetihlai hian Pu N. Zangura chuan UDA Sorkar a siam theih thu Governor a hriattir a, Governor chuan May ni 2, 2025 khan Shri N. Zangura chu CEM thar atan a ruat a. Mahse Pu V. Zirsanga hian High Court-ah thubuai a thehluh avangin August ni 8, 2025 khan High Court chuan Pu V. Zirsanga hi karhnih chhungin floor test a nei tur a ni tih leh kum 2025-2026 budget chu awmze neilo ani tih a lo puang tawh a ni.

Source: I&PR Department LADC, Lawngtlai