Taitea Pautu leh 'Thatea Streaming Club for Taitea' ten Mizo Talent top 30 tling Lalrinawma thilpek hlan

Aizawl | August 13, 2025: Youth Icon 2024 Lalsangliana (Taitea) leh a fans group zinga mi 'Thatea Streaming Club for Taitea' te chuan Mizo Talent-a tel Phenglawng tum thiam Lalrinawma chu top 30 a tlin lawmpui nan thil pek an hlan.

LPS Vision Production in kum 2024-a Youth Icon a buatsaiha pakhatna Taitea Pautu leh a fans group te chuan vawiin tlai khan Rinawma hi Aizawla a thlenna Kimtea Varte te In, Zonuamah an len chilh a, top 30-ah a tling chu an lawmpui zia lantir nan pawisa fai leh Taitea Brand T-shirt leh thil dangte an hlan.

Youth Icon Taitea chuan kum 16 mi Rinawma talent chu ropui a tih thu a sawi a, Mizo Talent First Round intihsiaka phenglawng a tum in a rilru a hneh thu leh thiam a tih thute a sawi a, mit lama harsatna nei chunga a talent te mipui hmuha pho chhuak tura intihsiakna a hmachhawn ngamna chu entawntlak a tih thute a sawi a, a kal leh zelna turah duhsakna a hlan.

Taitea chuan amah ngei pawh LPS Vison production buatsaih Youth Icon atanga Zoram mipui hriat a nih thu leh, LPS zar a zo nasa a, Youth Icon intihsiakna neih lai leh a hnu lam thlengin mipui duhsakna nasa tak a dawn thu a sawi a, hengte avang hian LPS buatsaih tho Mizo Talent-a tel Rinawma duhsakna thil pek han hlan ve ngei chu a duh a, a fans group 'Thatea Streaming Club for Taitea' te tangkawpin hma an la ta tih a sawi.

LPS Vision Production buatsaih 'Mahindra XUV 3XO Mizo Talent 2025' in ngaih hlut a hlawh hle a, Contestant zingah Lalrinawma (16), Nalzawl khua in lawm a hlawh zual a, a mit a del chunga Phenglawng a tum thiamna chuan mi rilru a hneh hle.

'Mahindra XUV 3XO Mizo Talent 2025' First round intihsiakna chu zawh fel a ni tawh a, top 30 round chu August ni 14-16,2025 chhungin neih leh a ni dawn a ni.

[Join WhatsApp channel for updates- https://whatsapp.com/channel/0029Vb66gtL8KMqnoM2JIz12 ]