Journalist Kimi Colney-in Ph.D

Aizawl | August 4, 2025: Mizo hmeichhia Journalist kan neih zinga hriam ber pawl Kimi Colney chuan, 'Media conflict and nationalism: a study on the role of media in shaping Mizo nationalism,' tih thupui hmangin Ph.D a hlawh chhuak.

Kimi Colney hi Mizoram Journalists' Association member niin, Accredited Journalist a ni a, thenawm state nena ramri buai leh Myanmar lama Zofate harsatna tawh chungchangah pawh hnam thinlung pu-a thahnemngai tak, a theihna lam kawnga thawhhlawk tak a ni a. India ram pawn thlenga a hna kaihhnawiha thusawi leh zirtirna pe tura sawm hlawh phak a ni.

Kimi hian, tunah hian EastMojo leh The Caravan Magazine-ah a ziak mek a. Newslink, News 18, Mizoram Post, Times of India, The Wire, Article 14 leh Down to Earth-ah te a lo ziak tawh thin a. Pasal fanau nei chungin journalist tha tak a ni mai pawh ni lovin, Ph.D hial a hlawhchhuak hi a ropui hle a ni.

Kimi Colney hi a nun a chhuk chho ve hle a, he zinkawng a zawh mek lai hian a pa a sun bakah a laina hnai tak takte'n mual an liamsam bawk a. Hmeichhe chhel leh chhuanawm tak a ni.