NANGMAHA A ṬHA BER I NIH THEIH NAN, PATHIAN CHU A ṬHA BER PE RAWH

-Rick Warren

- Aug 5, 2025

“Ka kut nghah avanga Pathian thilpek nangmaha awm kha chhem alh turin ka hriatpui che a ni. Pathianin hlauhna thlarau min pe lo va, thiltihtheihna leh hmangaihna leh rilru fel tak neihna thlarau min pe zawk si a.” 2 Timothea 1:6-7

Timothea’n Paula missionary zinkawnga a zui khan, Timothea chu ala naupang hle a. Paulan Ephesi khawpuia kohhran dinnaa pui tur leh kaihhruai turin a tir a ni. Timothea chu hlauhna tinrengin khat mahse, Pathianin a hmang a ni.

Timothea nun atanga Pathian kohna tih hlawhtlin dan tur kawng thum lo en ila.

*Pathian thilpek i dawn chu ti pung zel rawh*

Bible chuan, “I naupanna tu mahin ngainep suh se; thusawi kawngah te, chetze kawngah te, hmangaihna kawngah te, rinna kawngah te, thianghlimna kawngah te ringtute tihhmuhtu ni zawk ang che … Nangmaha awm thilpek, hrilh lawk anga upahote kut nghata Pathianin a neihtir che kha thlahthlam suh. Mi zawng zawng hnena i sawtna alan theih nan chung thilah te chuan taima la, chungah chuan inhmang zo rawh” (1 Timothea 4:12, 14-15) 

Paulan Timothea hnenah he thu hi a sawi bawka, “Ka kut nghah avanga Pathian thilpek nangmaha awm kha chhem alh turin ka hriatpui che a ni. Pathianin hlauhna thlarau min pe lo va, thiltihtheihna leh hmangaihna leh rilru fel tak neihna thlarau min pe zawk si a.” 2 Timothea 1:6-7

Ringtu i nihna angin i talent leh Pathian thilpek i dawn chu damchhunga ti pung zel tura mawhphurhna pek i ni tawh a ni.

*Thil dang intihbuai tir suh*

Paulan 1 Timothea 4:16-ah Timothea chu a hrilha, “Nangmah leh i zirtirnaah chuan fimkhur la; chung thil tiin awm reng rawh; chutiang tiin nangmah leh i thu ngaithlatute a chhandam dawn zuk nia.”

Sumdawn duhna te, chhungkaw ngaihpawimawhna te, hna ngaipawimawhna te leh pawisa khawl duhna te avanga kawng zawh sual hi a hlauhawm hle a ni. Mi tamtakin an hun tam zawk chu Internet-ah leh phone-ah an khawhral hial a ni. Isua zuitu i nihna angin, thil pawimawh tak tak zawk chu i ngaihtuah a ngaia, chutichuan Pathian kohna che chu i ti hlawhtling thei ang.  

*Pathian chu i theihna sang ber pe rawh*

Kan Bible chuan, “Rinna intihsiakna tha chu bei la, chatuan nunna chu vuan rawh; chumi chang turin koh i ni a; hretu tam tak mit hmuhah tanna tha chu i tan tawh kha” (1 Timothea 6:12). Pathianin thawh tur bik neiin a ko che a, mahse chu chu i hun tha ber te, i theihna sang ber te, thilpek tha ber te leh a lama i hawi tlatna atang chauhin i ti hlawhtling thei ang. 

Paulan Timothea chungchang hetiang hian a sawia, “Timothea ang reng hi tumah ka nei si lo” Philippi 2:20. Thlan lunga thuziak atan nise chu thu aia mawi zawk chu a awm thei dawn em ni? Timothea ang reng reng hi khawvel hmun dangah an awm lo. Thil dang a ngaihtuah ve lo. Pathianin a kohnaah chuan a inpe em em mai a ni. Tuman an tibuai lo va, an tihnual bawk hek lo. Pathian chu a theihna sang ber a pe a ni.

Pathian chu i theihna sang ber i peka, a kohna che i chhan bawk chuan, Pathian pawhin nangmaha a tha ber a rawn tarchhuak dawn a ni.

 

Ngaihtuah chhunzawm atan

* Pathian thilpek i dawnte chu engtin nge i tihpun zel le?

* Pathianin a kohna che i chhanna lama daltu awm thei apiang te chu engtin nge ilo tihkian zel le?

* Nitina i thiltih thinah engah te nge i theihna sang ber i pek thin? I rawngbawlnaah leh kohna i dawnah te chutiang chuan i ti ve tho em 

[Lettu: Sangpuia]