Leader of Opposition leh Principal Accountant General inkawm

Aizawl | July 02, 2025: Vawiin chawhnu dar 1 khan Leader of Opposition & Public Accounts Committee (PAC) Chairman Lalchhandama Ralte leh Principal Accountant General (Mizoram) Samar Kant Thakur (IAAS) chu Leader of Opposition pisa, Assembly Annexe-ah an inkawm a, Sorkar department-te pawisa hmanralna uluk taka enzui a tul thu an sawi.

Principal AG Samar Kant Thakur chuan PAC tel lovin Mizoram AG office chuan hna an thawk thei lo tih a sawi a, an hna pui ber pawh PAC hnathawh report pek a ni, a ti. Leader of Opposition Lalchhandama Ralte pawhin PAC chuan theihtawp chhuaha hna an thawh thu leh Ttunhnaiah pawh Mizoram khaw chhak lam leh chhim lam tlawha an fehchhuah thu a sawi.

Principal Accountant General hian PAC Chairman Lalchhandama hnenah rawtna thlenin, Mizoram PAC chu Central PAC kalphung anga kal ve tura a duh thu leh a tul a nih chuan workshop / seminar buatsaih tura a inpeih reng thu a sawi a. Comptroller & Auditor General of India hnena PAC report thlen chu an hnathawh ber a nih thu a sawi bawk.

PAC hmalaknaah Judiciary a huam leh huam loh sawihonaah Principal AG Thakur chuan, High Court leh Supreme Court thlengin a huam tih a sawi a. Amah erawh chu, office establishment chauh an khawih thei thung, tih a sawi a. PAC pawimawhna sawiin, Sorkar department leh ministry-te excess expenditure chu PAC chauhin a regularize thei a, a process muang deuh mah se, PAC hnathawh chu a effective hle tih a sawi bawk.

Leader of Opposition leh Principal AG inkawmnaah hian AG Official bakah Mizoram Legislative Assembly Secretariat official – Addl. Secretary Lalthangmawia, leh Committee Officer John Lallawmsanga Sailo te an tel.

[Join WhatsApp channel for updates- https://whatsapp.com/channel/0029Vb66gtL8KMqnoM2JIz12 ]