Health Worker nghet lak turah contract-a thawkten an tan 50% tal dah phut; Contract Health Worker te tana reservation pek hi a remchang lo

Aizawl | July 30, 2025: Mizoram Contract Health Workers Association (NHM) chuan, vawiin khan Chief Minister Office kawtah Mizoram Sokarin Health Worker regular post 100 direct recruitment a lak turah 50% tal an tana dah phutin an pungkhawm.

Mizoram Contract Health Worker Association (NHM) worker aiawh te leh Chief Minister hian inbiakna an nei a, mahse, anni lam hian thu lawmawm engmah an dawn lo an ti a, an hmalak zel dan tur chu Health Department hnuaiah awm National Health Mission Employees Union Mizoram (NEUM) hnuaia awm an nih ang hemi te hmalakn an ngaichang phawt dawn a ni.

Mizoram Contract Health Workers Association (NHM) chuan, Mizoram Sokarin Health Worker regular post 100 direct recruitment a lak tura advertisement a chhuah ta mai hi hriatthiam har kan ti a. Hun rei tak atanga kan lo nghah tawh leh kan lo beisei ve em em, kan Minister te pawhin a min lo sawi hmuh,seniority angin a tahtawlhin min dahnghet tur a kan ngaih laiin, tuna hetiang a ruahmanna a awm ta hi keini Mizoram Contract Health Workers' Association te chuan pawm harsa kan ti a ni. Chuvangin keini chuan kan duh leh beisei ang ngeiin kan sorkar in Post 100 a lak turah mi 50 tal NHM hnuaia Contract Health Worker hna thawklai te hi min dahnghet ngei turin kan phut tlat a ni," an ti a.

"tuna Health Worker advertisement chhuak ah hian NHM hnuaia thawklai ten kan dil vengei theih nan computer certificate neilo leh kum over tawh, hun rei tak Mizoram hmun kilkhawr tak taka awm thin te (computer zirna hun leh hmun pawh awm lo) hi min hrethiamin kan dil ve theih dan tur Sorkar hian min ngaihtuah sak ngei rawh se," an ti bawk.

Hetihlai hian, Health & Family Welfare Department chaun vawiin vek khan hemi chungchang hi sawifiahna an tichhuak a, "Mizoram Contract Health Workers Association (NHM) te tana reservation pek hi a remchang lo," an ti.

Health & Family Welfare Department hnuaia Health Worker post 100 (one hundred) direct recruitment-a hnawhkhah phalna DP&AR leh Finance Deptt-in a pek angin, Health & Family Welfare Department chuan Advertisement No. 4 of 2025 ti chhuakin ni 24.8.2025 thleng dilna thehluh theih a ni vide No.A.12011/1/2025-DHS/MPW dt 22.07.2025.

Hetihlai hian Mizoram Contract Health Workers Association (NHM) (Centrally Sponsored Scheme) ten chung post zinga 50 (fifty) chu an tana reserve ngiatin Chief Minister Office kawtah vawiin ni 30.07.2025 (Wednesday) hian Press Release ti chhuakin sitting demonstration an nei a.

Mizoram Contract Health Workers Association (NHM) thil phut chungchanga thil awmdan hetiang hi a ni:

1. Health Worker Recruitment Rules, 2011 (as amended 2024) in a sawi angin Health Worker post ruak hi 100% direct recruitment-a hnawh khah tur a ni a, chuvangin, Health Worker lakna tur hi open advertisement kal tlangin direct recruitment chauhva kalpui tur a ni. A dil thei/qualify apiang examination leh personal interview-a ti thate lak mai tur a ni.

2. The Mizoram Direct Recruitment (Conduct of Examination) Guidelines, 2018, DP&AR Notification No.A.12026/1/2017-P&AR(GSW) dt. 09.02.2018 in a sawi angin sawrkar hna eng pawh direct recruitment-a hnawhkhah tur reng reng chu Written Examination leh Personal Interview kal tlanga tih tur a ni.

3. Mizoram Contract Health Workers Association (NHM) te tan hian The Government of Mizoram Regularization of Centrally Sponsored Scheme (CSS) Employees Scheme, 2024 a awm a. Chumi dan hmang chuan a tling (eligible) te chu regularize theih an ni.

4. Sawrkar hna lak chungchangah a bika induhsakna neih hi India Constitution Article 14 & 16 kalh a nih avangin tute emaw induhsak bik hi a rem chang lova, India Constitution provision bawhchhiatna a ni.

Hetiang a nih avangin Mizoram Contract Health Workers Association (NHM) te tana reservation pek hi a remchang lo a ni.