Thuthar thehdarhtute tan Mamit-ah Media Workshop buatsaih

Mamit | June 24, 2025: Vawiin khan District Information & Public Relations Officer Chamber-ah Mamit District chhunga Print leh Digital Media-te tan DIPRO Mamit chuan “Media Workshop”a buatsaih.

Vawiin workshop chawhma hun hi DIPRO Biaknungi'n kaihruaiin MJA Mamit President Lalhuma'n Media workshop buatsaihtu nodal department I&PR Department- te chungah lawmthu a sawi a, workshop chu hmang tangkaia, paper zirho turte uluk taka zir tur leh media mite'n hmasawnnana hmang ngei turin kalkhawmte a chah a. Tunlaiah Mizo tawng ziah dan mai bakah lam rik danah pawh dik lo tam tak a awm tawh a social media hmanga video siam thinte pawn Mizo tawng hman dikna chang kan hriat a pawimawh thu a sawi.

He hunah hian Mamit Vision Director KTC Lalrinchhana pawhin tunlai khawvel leh hmasawnna mila kal thiam chu thil pawimawh leh kan tih makmawh a nih tawh thu a sawi a, print media leh digital media te pawhin kan nihna leh dinhmun hmasa hmang tangkai chung leh mipuite rilru leh duhdan hre chunga inher rem a ngaihna a pianga hmasawnna kawng kan zawh chu a tul tak zet tawh thu a sawi bawk.

Chawhnu hun hi MJA Mamit Vice President RD Darthanzauva'n a kaihruai a, “Traditional Media and New Media”- Vanneihtluanga ziah leh “Mizo Tawng ziah dan dik” - Dr H Laldinmawia ziah te chu DIPRO Biaknungi, leh MJA Mamit C Lalramdinzela te kaihhruaina hnuaiah zirhona neih a ni a, thupui zirhona atang hian hmasawnna tur hrang hrangte kalkhawmte atangin sawihona neih zui a ni bawk.